कैलालीको एक सामुदायिक वन उपभोक्ता समूहका अध्यक्षलाई अख्तियार दुरुपयोग अनुसन्धान आयोगको टोलीले ८० हजार घुस रकमसहित रंगेहात पक्राउ गरेको छ ।

महेन्द्रनगरस्थित आयोगको कार्यालयबाट खटिएको टोलीले धनगढी उप–महानगरपालिका–११ स्थित सीताराम सामुदायिक वनका अध्यक्ष रामप्रसाद रानालाई धनगढीको पार्कमोडबाट ८० हजार रुपैयाँसहित बिहीबार पक्राउ गरेको हो ।

रानाले ट्याक्टर चालकसहित बरामद भएको काठको मुद्दा मिलाइदिने भन्दै सेवाग्राहीबाट उक्त रकम लिएको अख्तियारका प्रवक्ता तरानाथ अधिकारीले जानकारी दिए । सव डिभिजन कार्यालय तारानगरले केही दिनअघि ट्याक्टरसहित काठ बरामद गरेको थियो । सव डिभिजन कार्यालयका रेन्जर रामअवतार चौधरीले घुस मागेको भन्दै रानाले सेवाग्राहीबाट उक्त रकम लिएको खुलेको अख्तियारले जनाएको छ ।