प्रधानमन्त्री र भारतीय गुप्तचर संस्था ‘रिसर्च एन्ड एनालाइसिस विङ’ (रअ) प्रमुखबीचको भेटको विषय सार्वजनिक गर्न नेत्रविक्रम चन्द नेतृत्वको नेकपाले माग गरेको छ ।

नेकपाको जनपरिषद नेपालले विज्ञप्ति जारी गर्दै गत बुधबार राति प्रधानमन्त्री केपी ओली र ‘रअ’ का प्रमुख सामन्तकुमार गोयलबीच भएको छलफलको विषयवस्तु सार्वजनिक गर्न माग गरेको हो ।

शनिबार विज्ञप्ति जारी गर्दै केन्द्रीय जनपरिषद, नेपालका प्रमुख सन्तोष बुढामगरले छलफल गोप्य रहनु गम्भीर आपत्तिजनक भएको बताएका छन् ।

 ‘हालै नेपाल सरकारका प्रधानमन्त्री केपी ओलीले भारतीय खुफिया संस्था ‘रअ’ का प्रमुख सामन्तकुमार गोयलसँग भेटघाट गर्नु भनेको नेपाल र नेपाली जनताका निम्ति हदैसम्मको लज्जास्पद विषय हो,’ बुढामगरको विज्ञप्तिमा भनेका छन्, ‘यसले नेपालको संसदीय व्यवस्था दलालहरूको हातबाट सञ्चालित छ भन्ने कुरा स्पष्ट गर्दछ ।’ 

भेटघाटमा कुन विषयमा छलफल भयो भन्ने कुरा गोप्य रहनु गम्भीर आपत्तिको विषय भन्दै विज्ञप्तिमा तत्काल उक्त विषयलाई नेपाली जनतासामु सार्वजनिक गर्न माग गरिएको छ ।