५ कार्तिकमा नेपाल आएका भारतीय खुफिया एजेन्सी रअका प्रमुख सामन्त कुमार गोयलले नेपाली राजनीतिमा एउटा लामो तरंग छोडेर गएका छन् ।
उनी नेपाल आएपछि प्रधानमन्त्री केपी शर्मा ओलीसँग भएको उनको गोप्य भेटघाट र अन्य नेताहरुसँग उनले गरेको भेटघाटका कारण अहिले पनि नेपाली राजनीति तरंगित भइरहेको छ ।
यो विषयमा नेपाली राजनीतिमा चासो राख्ने अधिकांशले प्रधानमन्त्री ओलीसँगको भेटको चर्को आलोचना गरेका छन् । तर, गोयलले प्रधानमन्त्री ओलीसँग मात्र होइन, नेपालमा हुँदा अन्य नेताहरुसँग पनि भेट गरेका थिए ।
भारतीय मिडिया द प्रिन्टले त गोयलले नेपालमा जनता समाजवादी पार्टीका संघीय अध्यक्ष बाबुराम भट्टराईसँग पनि भेट गरेको उल्लेख गरेको छ । अन्य नेताहरुसँग पनि भेट भएको द प्रिन्टको दाबी छ ।
तर, यता गोयलसँग आफ्नो भेट नभएको भन्दै नेकपाका अध्यक्ष पुष्पकमल दाहाल प्रचण्ड र माधवकुमार नेपालले विज्ञप्ति नै निकालेका छन् । त्यस्तै, नेपाली कांग्रेसका सभापति शेरबहादुर देउवाले पनि आफूले रअ प्रमुख गोयलसँग नभेटेको बताएका छन् ।
जे होस्, प्रधानमन्त्रीले चाहिँ रअ प्रमुखसँग भेट गरेको स्वीकार गरेका छन् । उनीनिकट तथा प्रदेश पाँचका मुख्यमन्त्री समेत रहेका नेकपा नेता शंकर पोखरेलले त रअ प्रमुख गोयलले भारतीय प्रधानमन्त्री नरेन्द्र मोदीको सन्देश लिएर आएको र उनीसँग प्रधानमन्त्रीको भेट हुनु स्वभाविक भएको बताएका छन् ।
तर, नेकपाकै दुई नेताले भने प्रधानमन्त्री ओली र गोयलको यो भेटको चर्को आलोचना गरिरहेका छन् ।
ती दुई नेता हुन्– नेकपा प्रवक्ता नारायणकाजी श्रेष्ठ र भीम रावल ।
नेपालको संविधानद्वारा निर्देशित परराष्ट्र नीति, स्वाधीनता र स्वाभिमान तथा सरकारको नेतृत्व गरिरहेको नेकपाको विचार,नीति र घोषणाको विपरीत भारतीय गुप्तचर रअ प्रमुखसंग नेपालका प्रधानमन्त्रीको जसरी वार्ता भयो र जस्तो समय र तरिकाले भ्रमण गराइयो यो आपत्तिजनक छ।कूटनीतिक मर्यादा विपरीत छ।
— Bhim Rawal, PhD (@BhimRawal179) October 22, 2020
श्रेष्ठ र रावल दुवैले सामाजिक सन्जालमा लेखेर मात्र होइन, विभिन्न मिडियामा ओलीको यो कदमको खुलेर विरोध गरेका छन् ।
नेकपा प्रवक्ता श्रेष्ठले सामाजिक सन्जालमा लेखेका छन्– गोयल प्रकरणस् नेपालको राजनीतिक एवं कूटनीतिक इतिहासमा यस प्रकृतिको पहिलो घटना हो यो ।यस्तो कार्यबाट राष्ट्रिय स्वाभिमान, प्रतिष्ठा र कूटनीतिक ओझ गिर्ने मात्र होइन, अन्ततः राष्ट्रिय सार्वभौमिकता एवं राष्ट्रिय हित कमजोर पार्ने कार्य हुन सक्दछ।
त्यस्तै, नेकपा नेता भीम रावलले पनि सामाजिक सन्जालमा यही आशयको ट्विट गरेका छन् । उनले ट्विटरमा लेखेका छन्– नेपालको संविधानद्वारा निर्देशित परराष्ट्र नीति, स्वाधीनता र स्वाभिमान तथा सरकारको नेतृत्व गरिरहेको नेकपाको विचार,नीति र घोषणाको विपरीत भारतीय गुप्तचर रअ प्रमुखसंग नेपालका प्रधानमन्त्रीको जसरी वार्ता भयो र जस्तो समय र तरिकाले भ्रमण गराइयो यो आपत्तिजनक छ।कूटनीतिक मर्यादा विपरीत छ।
अझ रावलले त प्रवक्ता श्रेष्ठले आपत्ति जनाउँदै गरेका ट्विटहरुलाई पनि रिट्विट गरेका छन् ।
गोएल प्रकरण: नेपालको राजनीतिक एवं कूटनीतिक इतिहासमा यस प्रकृतिको पहिलो घटना हो यो ।यस्तो कार्यबाट राष्ट्रिय स्वाभिमान, प्रतिष्ठा र कूटनीतिक ओझ गिर्ने मात्र होइन, अन्ततः राष्ट्रिय सार्वभौमिकता एवं राष्ट्रिय हित कमजोर पार्ने कार्य हुन सक्दछ। https://t.co/69yBStpgTv
— NKShresthaPrakash (@nksthaprakash) October 25, 2020
आफ्नै पार्टीका नेताहरुबाट समेत आलोचित यो कदमबारे प्रधानमन्त्री ओली र उनको सचिवालय अहिलेसम्म भने चुपचाप छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।