पछिल्ला दिन नेपालमा कोरोनाभाइरसका कारण हुने मृत्युको संख्या दिनहुँ बढिरहेको छ । 

स्वास्थ्य मन्त्रालयले दिएको जानकारीअनुसार नेपालमा कोरोनाका कारण अब मृत्यु हुनेको संख्या १२ सय ७६ पुगेको छ । बिहीबार पनि नेपालमा १९ जनाले कोरोनाका कारण ज्यान गुमाएका छन् । 

स्वास्थ्य मन्त्रालयका अनुसार बिहीबार सबैभन्दा धेरै काठमाडौंमा ५ जनाको कोरोनाभाइरसका कारण निधन भयो । त्यसपछि कास्की र दाङमा ३–३ जनाको कोरोनाका कारण निधन भयो । सुनसरीमा २ जना र ललितपुर, धनुषा, गुल्मी, भक्तपुर, लमजुङ र स्याङ्जामा कोरोनाका कारण एक–एक जनाको मृत्यु बिहीबार भएको छ ।

काठमाडौंमा मृत्यु हुनेमा एक ७१ वर्षकी महिला रहेकी छिन् । अन्य चार जना ६८, ६८, ५१ र ६७ वर्षका पुरुष हुन् । उनीहरु अधिकांशलाई निमोनिया देखिएको थियो ।

बिहीबार कास्कीमा कोरोनाका कारण मृत्यु हुने सबै पोखरा महानगरपालिकाका हुन् र उनीहरु सबै महिला हुन् । ६०, ७४ र ८३ वर्षकी महिलाले बिहीबार कोरोनाका कारण ज्यान गुमाएका हुन् ।

दाङमा बिहीबार ८१, ५६ र ७९ वर्षका पुरुषको कोरोनाका कारण निधन भएको हो ।

बिहीबार नै धरानमा २९ वर्षकी महिलाको मृत्यु भएको हो । उनी मिर्गौलासँग सम्बन्धित समस्याका कारण केही दिनअघि अस्पताल भर्ना भएकी थिइन् ।