कांग्रेस नेता प्रदीप पौडेलले बुधबार तनहुँमा वरिष्ठ नेता रामचन्द्र पौडेलमाथि भएको धडपकडको दोषी प्रधानमन्त्री केपी ओली नै भएको आरोप लगाएका छन् ।

बुधबार तनहुँको व्यास नगरपालिका १ तालघरेमा बनेको तालघरे र दुम्सी जोड्ने पुलको उद्घाटन गर्न पुगेका पौडेलको गिरफ्तारीमा ओलीले नामर्दी देखाएको भन्दै पौडेलले यस्तो आरोप लगाएका हुन् । 

नेपालको लोकतान्त्रिक आन्दोलनमा जीवनभर लडेको व्यक्तिमाथि पुल उद्घाटनमा जाँदा भएको व्यवहार निन्दनीय र आपत्तिजनक भएको पौडेलको ठहर छ । यो घटनालाई उनले सामन्तवाद र निरंकुशताको संकेत भनेका छन् । उनले सरकारको अहंकारको एउटा दृश्य तनहुँमा देखिएको भन्दै कडा शब्दमा आपत्ति जनाएका हुन्। 

‘कस्तो संस्कारको विकास गर्न खोजिएको हो नेपालमा ? के गर्न खोजिएको हो ? यो त चरम सामन्तवाद र निरंकुशताको संकेत हो । मै राज्य हुँ । मेरो बोली नै राज्य हो । मैले भनेपछि हुनुपर्छ भन्ने अहंकार देखियो ?’, नेता पौडेलले आक्रोश व्यक्त गर्दै भने,  ‘यो सबै कुराको दोषी वर्तमान प्रधानमन्त्री केपी ओली हुन् । प्रधानमन्त्रीले जसरी भ्रष्टाचारी र ठेकदारलाई संरक्षण गरेका छन् । त्यही अहंकार बोकेका मान्छे त्यहाँ भएका कारण यो परिस्थिति सिर्जना भएको हो ।’  

पौडेलले गणतन्त्रमा राजनीतिक संस्कार बिग्रिएको र नयाँ थिति बसाल्ने नाममा पुरानो थितिलाई पनि थिच्ने गरी विकृति बढ्दै गएको बताए । पञ्चायतमा विरोधीलाई जसरी दमन गरिन्थ्यो आज पनि त्यही भइरहेको भन्दै उनले आपत्ति जनाए । तनहुँ घटनाले सरकारको अनुहार उदाङ्गो बनाएको पौडेलको भनाइ छ । 

‘राजनीति समझदारी कायम गर्ने, एकले अर्कालाई सम्मान गर्ने र विकासको काममा सँगसँगै हिड्ने, यो हाम्रो नयाँ सिद्धान्त हुनुपर्ने । तर, ठिक उल्टो भयो’, पौडेलले भने, ‘पञ्चायतमा विरोधीलाई जसरी दमन गरिन्थ्यो । त्यसरी नै दमन गर्न थालियो । यसले सरकारको अनुहार उदाङ्गो बनाएको छ ।’ 

घटनाको विषयमा केन्द्र सरकार चुपचाप बसेको भन्दै उनले आपत्ति जनाए । ‘स्थानीय प्रशासनले सुझबुझ नभइकन त्यो गर्यो । कसैको उक्साहटमा गर्यो । तर संघीय सरकार के हेरेर बसेको छ अहिलेसम्म ? गल्ती भयो त्यसलाई सच्याउ भनेर गृहमन्त्री वा प्रधानमन्त्रीले किन भन्न सक्नु हुन्न ?’, सरकारसँग प्रश्न गर्दै पौडेल भन्छन्।  

पौडेलले लोकतन्त्रका नायकलाई गिरफ्तार गरेर ओलीले आफ्नो नामर्दी देखाएको टिप्पणीसमेत गरेका छन् । पौडेलले ओली सरकारप्रति आक्रोश व्यक्त गर्दै ट्वीटरमा लेखेका छन्, ‘लोकतन्त्रका नायकलाई गिरफ्तार गरेर ओलीले आफ्नो नामर्दी देखाए। निरंकुश पञ्चायतको झझल्को दिने ओली प्रवृत्तिले सिमा नाघिसक्यो । बुट बजार्दै सडकमा फौज उतारेर कायरता छोप्ने ओलि तमासाले डिङ्गो मार्नेवाला छैन। हेक्का रहोस निरंकुश ओलीहरुलाई नै सत्ताच्युत गरेर प्राप्त गरेको लोकतन्त्र हो यो ।’ 

लोकतन्त्रका नायकलाई गिरफ्तार गरेर ओलीले आफ्नो नामर्दी देखाए।निरंकुश पञ्चायतको झझल्को दिने ओलि प्रवृत्तिले सिमा नाघिसक्यो । बुट बजार्दै सडकमा फौज उतारेर कायरता छोप्ने ओलि तमासाले डिङ्गो मार्नेवाला छैन।हेक्का रहोस निरंकुश ओलीहरुलाई नै सत्ताच्युत गरेर प्राप्त गरेको लोकतन्त्र हो यो ।

— Pradip Paudel (@paudelpradipNC) December 3, 2020