भारतको राजधानी दिल्लीमा विगत १२ दिनदेखि किसान आन्दोलन चलिरहेको छ । केन्द्र सरकारले जारी गरेको किसान ऐनको विरोधमा किसान आन्दोलित भएका हुन् । आन्दोलनरत किसानलाई भेट्नका लागि दिल्लीमा मुख्यमन्त्री अरविन्द केजरीवाल प्रदर्शनस्थलमा पुगेका छन् । सोमबार केजरीवाल दिल्ली-हरियाणा राज्यको  सिन्घु बोर्डरमा प्रदर्शन गरिरहेका किसानमाझ पुगेका थिए । त्यहाँ पुगेर उनले आफू किसानको यस आन्दोलनको पक्षमा रहेको बताएका छन् । 

‘म सुरुबाट नै किसानको संघर्षमा साथै छु, किसानले उठाएको मुद्दा र संघर्ष जायज छ।’ केजरीवालले आन्दोलनरत किसानमाझ भने । केन्द्र सरकारले आन्दोलनका लागि दिल्ली आएका किसानलाई नियन्त्रणमा लिएर थुन्ने योजना बनाएको केजारीवालले दावी गरेका छन् । 

उनको भनाइ अनुसार केन्द्र सरकार र प्रहरीले दिल्लीका ९ रंगशालालाई जेल बनाउनका लागि प्रस्ताव गरेका थिए । ती रंगशालालाई जेल बनाएर आन्दोलन गर्न आएका किसानलाई त्यहाँ थुन्ने योजना मोदी सरकारको थियो। तर आफूले त्यसो गर्नका लागि अनुमति नदिएको केजरीवालको भनाइ छ । 

आन्दोलनरत किसान र सरकारबीच ५ चरणमा वार्ता भइसकेको छ । तर कुनै निकास निस्किएको छैन । आन्दोलनरत किसानले भोली भारत बन्दको घोषणा गरेका छन्।