प्रहरीले भक्तपुरको मध्यपुर ठिमीमा मंगलबार संयुक्त सवारी चेकजाच अप्रेसन चलाइरहेको थियो । महानगरीय ट्राफिक प्रहरी महाशाखा र महानगरीय प्रहरी परिसर भत्तपुरले मंगलबार दिउँसो पाटीविहारमा चलाएको संयुक्त सर्च अप्रेशनमा प्रहरीले नयाँ ठिमीतर्फ जाँदै गरेको बा १५ च नम्बरको ह्यून्डाइ गाडीलाई रोक्यो ।
त्यसपछि सुरु भयो–प्रहरीको सोधपुछ । यही दौरान प्रहरीले यसै गाडीबाट विभिन्न शंकास्पद कागजात बरामद गर्यो ।
अनुसन्धानको दौरान ती व्यक्तिले गरेका शंकास्पद रवैयाले संयुक्त टोलीका प्रहरीको मनमा चिसो पस्दै गएपछि ती व्यक्तिलाई थप अनुसन्धानका लागि टोलीले भक्तपुर प्रहरीको जिम्मा लगायो । त्यसपछि नक्कली लाइसेन्स बेच्ने उनको धन्दाको रहस्य खुल्यो ।
प्रहरी नियन्त्रणमा रहेका सिन्धुपाल्चोक घर भई हाल भक्तपुर ठिमी बस्ने २८ वर्षीय आशिष गिरीले नक्कली लाइसेन्स बिक्री वितरण गर्ने काम केही वर्षदेखि गर्दै आएका थिए । तर उनी एक्लै नभई यसमा यातायात कार्यलयका कर्मचारीहरूको मिलेमतोमा हुनसक्ने प्रहरीको अनुमान छ ।
उनले एक लाइसेन्स बराबर ३० हजारदेखि सवा लाखसम्ममा विक्री गर्ने गरेको महानगरीय प्रहरी परिसर भक्तपुरले जनाएको छ । प्रहरीले उनको साथबाट विभिन्न व्यक्तिको नागरिकताको प्रतिलिपि ४ थान, विभिन्न बैंकको २५ लाख रुपैयाँ बराबरको ४ थान चेक, ४१ हजार नगद तथा मोबाइल तीन थान र केही थान नक्कली लाइसेन्ससमेत बरामद गरेको छ।
उनले प्रायः मृतक र म्याद गुज्रेर खारेज भएका लाइसेन्स नम्बर यातायात कार्यालयबाट लिने गर्थे। पछि सोही नम्बरबाट नक्कली नयाँ लाइसेन्स बनाएर बिक्री गर्ने गरेको भक्तपुर प्रहरीका प्रवक्ता सुवास बुढाथोकीले जनाए।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।