अमेरिकामा फाइजर कम्पनीले बनाएको कोरोनाभाइरसविरुद्धको भ्याक्सिन प्रयोग गर्न आजबाट अनुमति दिइने भएको छ । त्यहाँ यो खोपको प्रयोग गर्न अनुमति मिलेसँगै यसलाई व्यापक रुपमा खोप दिइने बताइएको छ ।

कोरोनाभाइरस भ्याक्सिनको विषयमा जिम्मेवारी लिएका त्यहाँका अधिकारीहरुले यो साताको अन्त्यसम्म ३० लाख डोज कोरोनाभाइरस भ्याक्सिन सबै राज्यमा पुग्ने बताइएको छ । 

यो भ्याक्सिन ९५ प्रतिशत प्रभावकारी भएको बताइएको छ ।

अमेरिकामा पछिल्ला दिनमा कोरोनाभाइरसका कारण हुने मृत्युको संख्या निकै बढ्न थालेको छ । शनिबार अमेरिकामा एकै दिनमा ३ हजार ३ सय ९ जनाले कोरोनाका कारण ज्यान गुमाएका थिए । जोन्स हप्किङ्स विश्वविद्यालयका अनुसार विश्वभर एकै दिनमा एउटा देशमा कोरोनाका कारण ज्यान गुमाउने संख्या यो नै सबैभन्दा धेरै हो । 

नोभेम्बर यता अमेरिकामा कोरोनाका कारण ज्यान गुमाउनेको संख्या निकै बढ्दै छ ।

अमेरिकामा सोमबारबाट यो भ्याक्सिन लगाउन थालिए पनि बेलायतमा यसअघि नै यो भ्याक्सिन लगाउन थालिइसकिएको थियो । 

अमेरिकी सरकारले सोमबार अमेरिकाका १ सय ४५ ठाउँमा यो भ्याक्सिन पुग्ने बताएको छ । 

विश्वमा कोरोनाभाइरसविरुद्ध बनिरहेका भ्याक्सिनमा फाइजरको भ्याक्सिन एउटा यस्तो भ्याक्सिन हो, जसले अन्तिम चरणको परीक्षणमा निकै राम्रो नतिजा देखाएको थियो । 

यो भ्याक्सिन दुई चरणमा लगाउनु पर्ने बताइएको छ । पहिलो भ्याक्सिन लगाएको २१ दिनमा फेरि यसको दोस्रो डोज लिनु पर्ने हुन्छ । पहिलो डोजको भ्याक्सिन लिएपछि यसले इम्युनिटी पावर बढाउने र दोस्रो डोजको भ्याक्सिनले सात दिनपछि काम गर्ने बताइएको छ ।