नेपाल कम्युनिस्ट पार्टी (नेकपा)को स्थायी कमिटी बैठकमा प्रधानमन्त्री तथा नेकपा अध्यक्ष केपी शर्मा ओलीले संवैधानिक निकायमा कुनै नाम सिफारिस नभएको बताएका छन् ।
यसअघि संवैधानिक परिषद्सम्बन्धी अध्यादेश ल्याएर मंगलबार साँझ प्रधानमन्त्री ओलीले बालुवाटारमा बैठक राखेका थिए । बैठकले केही संवैधानिक पदमा रिक्त स्थानमा कुनै नाम सिफारिस भएको हुनसक्ने अनुमान निकै गरिएको थियो ।
तर, आज बसेको स्थायी कमिटी बैठकमा प्रधानमन्त्री ओलीले हिजोको बैठकमा कुनै नाम सिफारिस नभएको जानकारी दिएका हुन् । नेकपाका प्रवक्ता नारायणकाजी श्रेष्ठले दिएको जानकारीअनुसार ओलीले हिजो छलफल मात्र भएको जानकारी स्थायी कमिटी बैठकमा दिएका हुन् ।
पार्टी अध्यक्ष प्रधानमन्त्री ओली मंगलबार जारी अध्यादेश फिर्ता लिन तयार भएको जानकारी बैठकमा दिएको प्रवक्ता नारायणकाजी श्रेष्ठले जानकारी दिएका छन् । साथै प्रचण्ड–नेपाल समूहले संसदको विशेष अधिवेशनको माग गर्दै राष्ट्रपति समक्ष बुझाउन तयार पारेको सांसदको हस्ताक्षरसहितको निवेदन फिर्ता गर्ने भएको छ ।
बैठकमा उपस्थित हुन अस्वीकार गरिरहेका ओली प्रचण्डसँगको दुई चरणको वान टु वान संवादपछि आजको स्थायी समिति बैठकमा सहभागी हुन राजी भएका थिए ।
अब स्थायी समितिको अर्काे बैठक ५ गते बस्ने र ५ गतेका लागि तोकिएको केन्द्रीय समिति बैठक १० गतेका लागि सारिएको श्रेष्ठले जानकारी दिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।