प्रधानमन्त्री तथा नेपाल कम्युनिस्ट पार्टी (नेकपा)का अध्यक्ष केपी शर्मा ओलीले संसद विघटनको प्रस्ताव गरेपछि यसको व्यापक आलोचना भएको छ । 

आइतबार बालुवाटारमा बसेको आकस्मिक बैठकमा प्रधानमन्त्री ओलीले संसद विघटनको प्रस्ताव गरेका थिए ।

उनी अहिले यो सिफारिस लिएर राष्ट्रपति विद्यादेवी भण्डारीकहाँ पुगेका छन् ।

ओलीको यो सिफारिसको नेकपाकै नेताहरुले पनि विरोध गरेका छन् । त्यस्तै प्रमुख प्रतिपक्षका नेताहरुले पनि यसको चर्को विरोध गरेका छन् । प्रमुख प्रतिपक्ष नेपाली कांग्रेसका नेता प्रदीप पौडेलले ओलीको यो कदमलाई जनताको अपमान भनेका छन् ।

‘जनमतको योभन्दा ठूलो अपमान हुन सक्दैन,’ उनले ट्विट गरेका छन्, ‘ओलीक्रेसीको प्रतिवाद गरौँ ।’

पौडेलले ओलीको प्रतिवाद गरेर मात्र देशलाई थप संकटमा जानबाट रोक्नु पर्ने सुझाएका छन् ।

दुई तिहाईको सरकार यति ठूलो जनमत लाई लत्याएर संसद् विघटनको मोडमा छ।जनमतको योभन्दा ठूलो अपमान अर्को केही हुनै सक्दैन । स्थापना भएदेखि उदाङ्गिएको ओली सरकार अब पूर्णतः नाङ्गो भइसकेको छ।ओलीक्रेसीको प्रतिवाद गरौ देशलाई थप संकटमा जानबाट रोकौं।

— Pradip Paudel (@paudelpradipNC) December 20, 2020