सरकारले संवैधानिक निकायहरूमा रिक्त रहेका ४५ पदमा नियुक्तिका लागि गरेको सिफारिस संसद सचिवालयमा दर्ता भएको छ । आइतबार दर्ता गरिएको चिठीमा मिति भने अगाडिको राखिएको संसद् सचिवालय स्रोतले जानकारी दिएको छ ।

प्रधानमन्त्री कार्यालयका सचिवले दर्ता गराएको पत्रमा अख्तियार दुरुपयोग अनुसन्धान आयोगका रिक्त पदमा प्रेमकुमार राई, जयबहादुर चन्द र किशोर सिलवालको नाम सिफारिस गरिएको छ ।

अख्तियारको प्रमुख आयुक्त सिफारिस गरिएका पूर्व गृहसचिव राई प्रधानमन्त्री ओली निकट मानिन्छन् भने, चन्द कांग्रेस सभापति शेरबहादुर देउवा निकटका हुन् । 
प्रतिनिधिसभा राष्ट्रपतिले विघटन गरिसकेकाले संसदीय सुनुवाइ हुन सक्दैन । संसदीय सुनुवाइ नभएको खण्डमा राष्ट्रपतिले नियुक्त गरेको ४५ दिनमा स्वतः नियुक्त हुने प्रावधान रहेको छ ।