प्रधानमन्त्री केपी शर्मा ओलीले पछिल्लो समय नेकपामा देखिएको विभाजनमा प्रदेशमा पनि केही हेरफेर गर्न खोजेको खण्डमा थप कदम चाल्ने चेतावनी दिएका छन् । 

बुधबार साँझ योहो टिभीमा अन्तर्वार्ता दिँदै प्रधानमन्त्री ओलीले यस्तो चेतावनी दिएका हुन् ।

अहिले सत्तारुढ नेकपा दुई कित्तामा बाँडिएको छ । प्रधानमन्त्री ओलीले अब अर्को समूहले प्रदेशमा पनि आफ्नो समीकरण बलियो बनाउने र प्रदेश सरकारहरुमा हेरफेर गर्ने सम्भावना बढेपछि यस्तो बताएका हुन् । 

केन्द्रमा अहिले नेकपा दुई समूहमा विभाजित छ । प्रदेशहरुमा पनि केन्द्रमा देखिएको विभाजनअनुसार भएमा अधिकांशमा ओली समर्थित नेताहरु अल्पमतमा पर्ने निश्चित छ ।

त्यसैले, प्रधानमन्त्री ओलीले अहिले प्रदेश र स्थानीय तहमा जुन समीकरण छ, त्यही छोड्नु पर्ने दोहोर्याएका छन् । 

‘मैले जनतामा जाने निर्णय गरेको छु,’ अन्तर्वार्तामा ओलीले भनेका छन् ।

नेकपा नेतृत्वमा ६ प्रदेशमा सबैमा ओली समर्थित सरकारहरु अब अल्पमतमा परेका छन् । त्यही भएर पनि ओलीले यस्तो चेतावनी दिएका हुन् । तर, उनले थप कदम के हुने भन्ने चाहिँ खुलाएका छैनन् ।