कोरोनाका कारण लामो समयदेखि बन्द रहेको नेपाल–भारत सीमा नाकाका कारण एकीकृत भन्सार जाँच चौकी (आइसिपी)ले चालू आर्थिक वर्षको मङ्सिरसम्म लक्ष्यभन्दा ११ प्रतिशत कम राजस्व संकलन गरेको छ ।
वीरगञ्ज भन्सार कार्यालयले चालू आवको साउनदेखि मंसिरसम्मको पाँच महिनाका लागि ६५ अर्ब २५ करोड ५५ लाख रुपैयाँ राजस्व संकलनको लक्ष्य पाएकोमा ५८ अर्ब १५ करोड ८९ लाख मात्र राजस्व उठाएको छ । उक्त रकम लक्ष्यभन्दा ११ प्रतिशतले कम हो ।
देशमा कोरोना संक्रमणका कारण अर्थतन्त्रमा परेको प्रभाव तथा सीमा नाका लामो समयदेखि बन्द रहेकाले सो अवधिमा तोकिएको लक्ष्य प्राप्त गर्न नसकिएको कार्यालयले जनाएको छ । सो भन्सार कार्यालयलाई आव २०७७÷७८ का लागि एक खर्ब ७१ अर्ब रुपैयाँ राजस्व उठाउन लक्ष्य दिएको छ ।
वीरगञ्ज भन्सार कार्यालयका अनुसार चालू आवको पाँच महिनामा ७६ अर्ब ३३ करोड रुपैयाँ बराबरको विभिन्न सामान भारततर्फ निर्यात भएको छ । सो अवधिमा वीरगञ्ज नाकाबाट सबैभन्दा बढी भटमासको तेल भारततर्फ निर्यात भएको बताइएको छ ।
कोरोना महामारी तथा सीमा नाका बन्द हुँदा भारततर्फ निकासी हुने सामानमा समेत प्रभाव पर्न गएको हो ।
वीरगञ्ज भन्सार नाका भटमासको तेल निकासी हुने मुख्य नाका मानिएको छ । बारा, पर्सामा रहेका १४ वटा उद्योगले यस्ता तेल निकासी गर्दै आएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।