सुदूरपश्चिम प्रदेशका भौतिक पूर्वाधार विकास मन्त्री पठानसिंह बोहरालाई मुख्यमन्त्री त्रिलोचन भट्टले पदमुक्त गरेका छन् ।

मुख्यमन्त्रीका प्रमुख स्वकीय सचिव शिवसिंह ओलीले मन्त्रीलाई पदमुक्त गरेको जानकारी दिए । ओलीका अनुसार मन्त्रीलाई हटाउने संविधानको अधिकार प्रयोग गर्दै हटाइएको हो ।

भौतिक पूर्वाधार विकास मन्त्री बोहरा केपी ओली पक्षका एक्ला मन्त्री हुन् । मन्त्री बोहरा भने अहिले काठमाडौंमै भएको र आफूलाई जानकारी नभएको बताए ।

बोहरालाई मंगलबार बिहान मुख्यमन्त्री भट्टले फोन गरेर र तपाई कुन पक्षमा भन्दै सोधेका र आफू ओली पक्षको  नेता भएको उनले जवाफ दिएको बोहराको भनाइ छ ।

केन्द्रमा भएको विभाजन अनुसार प्रदेशमा प्रचण्ड–माधव पक्षको स्पष्ट बहुमत छ ।

प्रचण्ड–माधव पक्षका केही नेता ओली खेमामा जाने तयारी गरिरहेकै बेला प्रचण्ड–माधव समूहका सुदूरपश्चिम प्रदेश इन्चार्ज भीम रावलले सुदूरपश्चिममा सक्रियता बढाइरहेका छन् । उनी दुई दिन यता सुदूरपश्चिममा छलफलमा रहेका छन् ।