नेपाल कम्युनिस्ट पार्टी (नेकपा) की नेतृ एवम् प्रतिनिधिसभाकी सांसद रामकुमारी झाँक्रीले ओलीपक्षका नेताहरू पार्टी कार्यालय कब्जा गर्ने, जनतामा भ्रम फैलाउने, अनावश्यक आरोप लगाउने जस्ता गलत कार्यमा लागेको बताएकी छन् । संसद विघटनको विरोधमा प्रचण्ड–माधव पक्षले सुर्खेतमा आयोजना गरिएको प्रदर्शनलाई सम्बोधन गर्दै झाँक्रीले ओली पक्षका नेताहरूलाई अहिलेको परिस्थितिको जवाफ ओलीसँगै नै माग्न आग्रह गरिन् ।
‘शासन व्यक्तिको होइन विधि हो,’ उनले भनिन्, ‘तर केपी ओलीले व्यक्तिको शासन लागू गर्न खोज्नु भयो । प्रधानमन्त्रीको यो उल्टो हिँडाइले देशलाई कुनै पनि फाइदा छैन । ओलीको रेडिमेट बोलीका पछि लागेका साथीहरूलाई म के आग्रह गर्छु भने पार्टी कसले विभाजन गर्यो त्यसको जवाफ पहिला ओलीसँग सोध्नुस् ।’
नेकपाको आधिकारिक चुनाव चिह्न र पार्टी झण्डाको वैध प्रचण्ड–माधव पक्षमा हुने भन्दै झाँक्रीले ७० जना मानिस बसेर १ हजार केन्द्रीय सदस्य बनाउँदैमा दुई तिहाई भन्न नमिल्ने बताइन् । भारतीय रअका एजेन्ट सामन्तकुमार गोएल्सको नेपाल भ्रमणपछि भएको नेकपा विभाजनको ठूलो रहस्य रहेको बताइन् । सर्वोच्च अदालतले प्रधानमन्त्रीको पक्षमा फैसला गरेको अवस्थामा नेपालको सार्वभौमसत्ता नै संकटमा पर्ने भन्दै उनले त्यसलाई सर्वोच्चले खारेज गर्नुपर्ने उनको माग छ ।
‘नेपाली जनताको लामो संघर्षपछि संविधान सभाबाट संविधान निर्माण गर्न सकियो । वाम गठबन्धनपछि हामीले चुनाव जित्यौँ,’ उनले थपिन्, ‘तर समृद्धिको बाटोमा अघि बढ्ने जनताको अपेक्षा प्रधानमन्त्रीले गलत बाटोमा हिँडेर समाप्त पारे । देशमा भएको प्रतिगामी ‘कु’ नहटेसम्म आन्दोलनका कार्यक्रम जारी राख्ने गरी कांग्रेस लगायत सबै राजनीतिक दललाई सँगै मोर्चा बन्दी गर्न म आग्रह गर्दछु ।’
कार्यक्रममा नेकपा सुर्खेत जिल्ला इन्चार्ज नरबहादुर विष्टले ओलीले गणतन्त्रलाई नै धरापमा पारेको आरोप लगाए । नेकपा सुर्खेतका सह–इन्चार्ज एवम् कर्णाली प्रदेश सभाका सदस्य बिन्दमान विष्टले ओली कर्णाली प्रति पूर्वाग्रह राख्ने भएकाले ओलीलाई नफालेसम्म कर्णालीको विकास सम्भव नभएको बताए ।
कार्यक्रममा सहभागी नेकपा जिल्ला कमिटी अध्यक्ष ध्रुवकुमार शाही सह–इन्चार्ज झकबहादुर मल्ल, सचिव कृष्ण जिसी लगायतका नेताहरूले सुर्खेती कम्युनिस्टहरू एक ढिक्का भएर गलत अभ्यासको प्रतिकार गरेको बताए । सुर्खेतसहित कर्णालीका १० वटै जिल्लाहरूमा विरोध प्रदर्शन गरिएको छ । प्रदर्शनमा नेता तथा कार्यकर्ताले उखु किसानका माग पूरा गर, प्रतिनिधिसभा विघटनको असंवैधानिक कदमविरुद्ध संघर्ष गरौँ, मार्क्सवाद–लेलिनवाद जिन्दावाद जस्ता नारा लगाएका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।