विभाजनको संघारमा पुगेका नेकपाका दुई समूहले एक अर्कालाई कारबाही गर्ने होड चलेसँगै कुन समूहको कारबाहीले वैधता पाउने भन्ने प्रश्नचिह्न खडा भएको छ । दुवै पक्षले आफूहरूले गरेको कारबाहीले वैधता पाउने भन्दै जिकिर गरेपछि कारबाहीको निर्णय अन्योल बनेको हो ।
प्रचण्ड–माधव पक्षले संसदीय दलका नेतालाई नै कारबाही गरेपछि मुख्यमन्त्री शेरधन राईले १५ सांसदलाई कारबाही गरे । अब कसको कारबाहीलाई वैधानिक मान्ने भन्ने बहस सुरु भएको छ ।
ओली पक्षले नेकपाको संसदीय दलको नेता मुख्यमन्त्री शेरधन राई भएकाले सदस्यलाई कारबाही गरेपछि अबका तीन महिना कारबाहीमा परेका सांसदले प्रदेश सभाको बैठकमा सहभागी हुन नपाउने दाबी गरेको छ ।
यता प्रचण्ड–माधव पक्षले संसदीय दलको बहुमत सांसदले दलको नेताबाट शेरधन राईलाई हटाइसकेको अवस्थामा उनले गरेको कुनै पनि कारबाहीले वैधता नपाउने दाबी गरेको छ ।
प्रदेश सभाको हिउँदे अधिवेशन ७ माघमा आह्वान गरिएको छ । प्रदेश सभा चलेसँगै मुख्यमन्त्रीविरुद्ध अविश्वासको प्रस्तावमाथि कारबाही सुरु हुनेछ । मुख्यमन्त्री शेरधन राईविरुद्ध नेकपा प्रचण्ड–माधव पक्षका ३७ सांसदको हस्ताक्षर सहितको अविश्वासको प्रस्ताव दर्ता भएको छ ।
प्रचण्ड–माधव समूहका पूर्वमन्त्री इन्द्र आङ्म्बोले मुख्यमन्त्रीविरुद्ध सदनमा अविश्वासका प्रस्ताव दर्ता गरेको र दलका बहुमत सदस्यले मुख्यमन्त्री शेरधन राईलाई दलको नेताबाट समेत हटाइसकेकाले निलम्बित मुख्यमन्त्री राईले गरेको कारबाही कानुनतः वैधानिक नहुने बताए ।
‘नेकपाको संसदीय दलको विधान समेत निष्क्रिय अवस्थामा छ’, उनले भने, ‘दलको विधानले कारबाही कार्यान्वयनमा जान सक्ने अवस्था नरहेकाले विधानलाई टेकेर गरिएको कारबाही प्राविधिक र कानुनी हिसाबमा पनि वैधानिक छैन ।’
आङ्म्बोले दलको विधान निष्क्रिय रहेकाले आफूहरूले संविधान र संसद नियमावलीलाई टेकेर दलका बहुमत सांसदको हस्ताक्षरसहित मुख्यमन्त्री राईविरुद्ध अविश्वासको प्रस्ताव प्रदेश सभामा दर्ता गराएको जानकारी दिए ।
उता नेकपा ओली पक्षका सांसद एव दलका प्रमुख सचेतक बुद्धिकुमार राजभण्डारीले दलको विधान विपरीत मुख्यमन्त्री राईमाथि अविश्वासको प्रस्ताव ल्याउने सांसदलाई दलको नेताको हैसियतले कारबाही गरेको बताए ।
उनले बिहीबार मात्र दलको विधान प्रदेश सभामा दर्ता भएको पनि बताए ।
‘संसदीय दलको विधान अनुरुप उहाँहरूले कारबाही गर्न पाउँने बाटो खुला हुने हामीले त्यही विधान अनुरुप निलम्बन गर्न नमिल्ने त ? प्रमुख सचेतक राजभण्डारीले प्रतिप्रश्न गरे ।
संसदीय दलको विधान नै निष्क्रिय
प्रदेश सरकार गठनसँगै नेकपाको संसदीय दलको विधान दलबाट पारित भएको थियो । तर, दलबाट पारित विधान प्रदेश समितिबाट अहिलेसम्म अनुमोदन हुन सकेको छैन । दलको विधान पार्टीको प्रदेश समितिबाट अनुमोदन गर्नुपर्ने प्रावधान छ ।
योसँगै दलको काम कारबाही अगाडि बढाउन ११ सदस्यीय संसदीय बोर्ड गठन गर्नुपर्ने व्यवस्था रहेको छ । त्यसका लागि संसदीय दलबाट निर्वाचित र दलको नेता, उपनेता, प्रमुख सचेतक र उपसचेतक चार पदाधिकारीसहितको ११ सदस्यीय संसदीय बोर्ड गठन गर्नुपर्नेछ ।
संसदीय बोर्डलाई पनि प्रदेश पार्टी समितिले अनुमोदन गर्नुपर्ने व्यवस्था रहेको छ । प्रदेशमा अहिलेसम्म नेकपाको दलले संसदीय बोर्ड गठन समेत गर्न सकेको छैन । संसदीय बोर्डले विधान विपरीत काम कारबाही गर्नेलाई आवश्यक कारबाही, सचेत गराउने लगायतका कार्य गर्न सक्नेछ ।
त्यसैगरी दलको विधानलाई कार्यान्वयनमा लान प्रदेश सभामा विधान दर्ता गराउनु पर्ने प्रावधान रहेको छ ।
मुख्यमन्त्री राईले दलको नेताको हैसियतमा आफूमाथि अविश्वासको प्रस्ताव लैजाने १५ सांसदलाई कारबाही गरेपछि बिहीबार १ बजे प्रदेश सभामा दलको विधान पनि सँगै दर्ता गरेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।