चालू आर्थिक वर्ष २०७७/७८ को पहिलो छ महिनामा विदेशी वस्तुको आयात घटेको छ । समीक्षा अवधिमा आयात घट्दा निर्यातमा वृद्धि भएको छ भने केही हदसम्म व्यापारघाटा समेत घटेको छ । 

भन्सार विभागले सार्वजनिक गरेको छ महिनाको तथ्यांक अनुसार ५ प्रतिशत आयातमा कमी आउँदा ६ प्रतिशतले निर्यातमा वृद्धि भएको हो । 

विभागको तथ्यांकअनुसार चालू आवको छ महिनामा ६ खर्ब ६१ अर्ब २४ करोडको विदेशी वस्तुको आयात भएको छ । यो गत आवको सोही अवधिको तुलनामा ४ दशमलव ८१ प्रतिशतले कम हो । गत आवको सोही अवधिमा ६ खर्ब ९४ अर्ब ६९ करोड बराबरको विदेशी वस्तुको आयात भएको विभागको तथ्यांक छ ।

यसैगरी, ६ महिनाको अवधिमा विश्वका विभिन्न देशमा गरी ६० अर्ब ७९ करोड ९९ लाख बराबरको स्वदेशी वस्तु निर्यात भएको छ । गत आवको सोही अवधिको तुलनामा ६ दशमलव १४ प्रतिशतले निर्यातमा वृद्धि भएको विभागको भनाइ छ । 

गत आवमा सोही अवधिमा ५७ अर्ब २७ करोड ७९ लाख बराबरको स्वदेशी वस्तु निर्यात भएको थियो । 

समीक्षा अवधिमा नेपालमा आयात हुने विदेशी वस्तुको पहिलो नम्बरमा पेट्रोलियम पदार्थ रहेको छ । सो अवधिमा ३२ अर्ब ९३ करोड बढीको डिजेल आयात भएको विभागको तथ्यांक छ ।