काठमाडौं : नेपालका लागि अमेरिकी राजदूत र्याण्डी बेरीले बिहीबार साँझ प्रधानमन्त्री केपी शर्मा ओलीसँग भेटवार्ता गरेका छन् । प्रधानमन्त्री निवास बालुवाटारमा पुगेर भेटवार्ता गरेको राजदूत बेरीले बताएका छन्
अमेरिकाको ४६ औँ राष्ट्रपतिका रुपमा जो बाइडेनले पदभार ग्रहण गरेपछि राजदूत बेरीले प्रधानमन्त्री ओलीसँग समसामयिक विषयमा छलफल गरेका हुन् ।
उनले भेटका क्रममा राष्ट्रपति बाइडेन प्रशासनले नेपाल तथा अन्य राष्ट्रसँग साझेदारी गर्न चाहेको खुलाएका छन् ।
‘अमेरिकामा बाइडेन नयाँ राष्ट्रपति भएको घोषणासँगै नयाँ राष्ट्रपतीय प्रशासनले नेपालसहित अन्य राष्ट्रसँग कुनै एक्लो राष्ट्र मात्रैले जुध्न नसकिने जलवायु परिवर्तनदेखि कोभिड-१९ जस्तो विश्व स्वास्थ्य संकट जस्ता हाम्रा साझा चुनौतीबारे छलफल गर्न मैले प्रधानमन्त्री ओलीलाई भेटेको हुँ’, उनले भनेका छन् ।
प्रधानमन्त्री ओलीले राष्ट्रपति विद्यादेवी भण्डारीले बिहीबारै नवनियुक्त राष्ट्रपति बाइडेनलाई कार्यकाल सफलताको शुभकामना दिएका थिए। उनीहरु दुवैले अमेरिकासँग मिलेर काम गर्न चाहेको इच्छा जाहेर गरेका थिए।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।