बाजुरा सदरमुकाम मार्तडीमा ६ महिनापछि यातायात सेवा सुरु भएको छ । साँफे–मार्तडी सडक खण्ड अवरुद्ध भएको करिब ६ महिनापछि सदरमुकाम मार्तडीमा यातायात पुगेका हुन् ।
साँफे–मार्तडी सडक खण्ड अन्तर्गत बार्जुगाड, ताँप्रीसेरा, बल्दे, दवारी, तिपाडा, ओलेना र पानीनाउला सम्मको भत्केको सडकमा बस सेवा सुरु हुने गरी सडक विभागले सडक निर्माण गरेको छ ।
गत साउन २५ गते राति बुढीगंगा नदीमा आएको बाढीले जडाङ्गामा रहेको बेलिब्रिज बगाएपछि मार्तडी सम्मको बस सेवा करिब ६ महिनासम्म बन्द भएको थियो ।
जडाङ्गामा बनाइएको अस्थायी काठे पुलमा जोखिम मोलेर बसहरू मार्तडी पुर्याइएको हो । बल्देदवारी सडकको स्तरोन्नति र जडाङ्गा नदीमा बन्ने बेलिव्रिज छिटो निर्माण गर्न सकेमा मार्तडीसम्म नियमित बस सेवा सुरु गर्न सकिने यातायात व्यवसायीको भनाइ छ ।
यसअघि धनगढीसम्म जान ३ वटा गाडी फेरेर मात्रै जानुपर्ने बाध्यता थियो । अब त्यसको अन्त्य भएको स्थानीय थानीय टेक बडुवालले बताए । अब सिधै मार्तडीबाट बसमा धनगढी, महेन्द्रनगर, काठमाडौं र नेपालगन्ज जान पाइने भएको छ ।
बडिमालिका नगरपालिकाको लगानीमा साँफे–मार्तडी सडकखण्ड अन्तर्गत जडाङ्गमा नदीमा गाडी गुड्ने काठेपुल निर्माण गरिएको बडीमालिका नगरपालिकाका नगर प्रमुख पदम बडुवालले बताए ।
‘बेलीब्रिज पुल निर्माण हुँदै छ । निर्माणमा समय लाग्ने भएपछि नगरपालिकाले जिप, ट्याक्टर, मोटरसाइकल लगायतका सवारी साधन गुडाउन मिल्ने गरी काठेपुल निर्माण गरेको हो’, उनले भने ।
बाजुराका प्रमुख जिल्ला अधिकारी कृष्ण गैरेले बाजुरा बासीका लागि सदरमुकाम मार्तडीबाटै नियमित बस सेवा सञ्चालनका लागि सम्बन्धित निकायसँग पहल गरिरहेको बताए ।
गत साउन २५ गतेको बाढीका कारण जडाङ्गामा रहेको बेलिब्रिज बगाएको करिब साढे ४ महिनापछि उक्त ठाउँमा नयाँ बेलिब्रिज निर्माणका लागि सडक डिभिजन कार्यालयले १ करोड ८८ लाखको ठेक्का खोलेर बेलिवृज निर्माणको काम भइरहेको सडक डिभिजन कार्यालय साँफेबगरले जनाएको छ । बेलिब्रिज निर्माण गर्ने जिम्मा जुनएम एसएमके बिल्डरर्स एन्ड कन्सट्रक्सन कम्पनी, धनगढी कैलालीले पाएको थियो ।
अहिले निर्माण कम्पनीले सामान ढुवानी गरेर बेलिब्रिज निर्माण कार्यको थालनी गरिसकेको सडक डिभिजन साँफेबगरका प्रमुख ललित खनालले बताए ।
साउन २५ गते राति बुढीगंगा नदीमा आएको बाढीले बेलिब्रिज बगाएको थियो । नदीमा रहेको बेलिब्रिज बगाएपछि सदरमुकाम मार्तडीसम्मको सडक सम्पर्क विच्छेद भएको थियो ।
२३ वर्षपछि सदरमुकाम मार्तडीसम्म पक्की बनेको सडक वर्षातमा सडक माथि र तलबाट खसेको पहिरोका कारण तहसनहस भई बिग्रेको छ । जसका कारण वर्षातमा करिब ३ देखि ४ महिनासम्म सदरमुकाम मार्तडी सम्मको सडकमा नियमित बस सेवा जहिल्यै अवरुद्ध हुने गरेको छ । बाढीकै कारण जडाङ्गाको बेलिब्रिजसँगै झोलङ्गे पुल र खेतियोग्य जमिन समेत बगाएको थियो ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
