हरिहरपुरगढी गाउँपालिका–१ चिसापानीमा श्रीमानले बन्चरो प्रहार गर्दा महिलाको मृत्यु भएको छ । चिसापानी बस्‍ने ३६ वर्षीया रमामाया घलानलाई  ४० वर्षीय शेरबहादुर भुजेलले बन्चरोले हिर्काउँदा मृत्यु भएको हो ।

जिल्ला प्रहरी कार्यालय सिन्धुलीका प्रहरी नायब उपरीक्षक एवं सूचना अधिकारी श्यामबहादुर खत्रीले दिएको जानकारीअनुसार शुक्रबार राति शेरबहादुरले रमामायालाई बन्चरोको पासोले टाउकोमा हिर्काएका थिए । 

श्रीमानको कुटाइबाट गम्भीर घाइते भएकी रमामायालाई उपचारका लागि जिल्ला अस्पताल हेटौडा मकवानपुर लगिएको थियो । उनको उपचारका क्रममा आज मृत्यु भएको जिल्ला प्रहरी कार्यालयले जनाएको छ । 

बन्चरो प्रहार गर्ने भुजेल घटनापछि फरार रहेका छन् । उनको खोजी भइरहेको प्रहरीले जनाएको छ ।