विप्लव नेतृत्वको नेपाल कम्युनिस्ट पार्टीको रुकुम पश्चिमका जिल्ला अध्यक्षसहित ५ जना पक्राउ परेका छन् । यही माघ १० गते जिल्लाको त्रिवेणी गाउँपालिका–६ बिसौनीमा प्रेसर कुकर बम राखेको आरोपमा उनीहरुलाई पक्राउ गरिएको प्रहरीले जनाएको छ । 

पक्राउ पर्नेमा त्रिवेणी गाउँपालिका–२ बेतखोलाका २४ वर्षका प्रेमबहादुर बोहरा (प्रशान्त), त्रिवेणी–९ प्युउगाका १६ वर्षका नवीन वली, मुसिकोट नगरपालिका–१ का १९ वर्षका सागर बुढा, सोही ठाउँका १७ वर्षका अभिषेक बुढामगर र सोही ठाउँका २७ वर्षका किरण रसाइली छन् ।

पक्राउ परेकामध्ये बोहरा विप्लवको विद्यार्थी संगठनका जिल्ला अध्यक्ष हुन् । उनीहरुले मुसिकोट नगरपालिका–१ को रावलबाडामा संगठन बिस्तार गरिरहेको विशेष सूचनाका आधारमा आज (आइतबार दिउँसो) रुकुमपश्चिम प्रहरीले पक्राउ गरेको हो । 

पक्राउ परेकाहरुको बारेमा थप अनुसन्धान भइरहेको जिल्ला प्रहरी कार्यालय रुकुम पश्चिमका प्रहरी प्रमुख डिएसपी धु्रवकुमार श्रेष्ठले जानकारी दिए ।