सत्तारुढ नेकपाको प्रचण्ड-माधव समूहले आज काठमाडौंमा शक्ति प्रदर्शनसहित विरोध सभा गर्दैछ । आजको प्रदर्शनमा २ लाख मानिस सडकमा उतार्ने रणनीतिमा रहेको प्रचण्ड-माधव समूहले विभिन्न क्षेत्रबाट निस्कने जुलुसमा केन्द्रीय नेतालाई जिम्मेवारी तोकेको छ । 

समूहका अध्यक्षद्वय प्रचण्ड र माधव कुमार नेपाल तथा वरिष्ठ नेता झलनाथ खनाल र केन्द्रीय संघर्ष समितिका संयोजक नारायणकाजी श्रेष्ठ बाहेकका सबै केन्द्रीय नेताहरुलाई आन्दोलनको मोर्चा तोकिएको छ । 

जसअनुसार काठमाडौं उपत्यकाको विभिन्न ५ स्थानबाट निस्कने जुलुसलाई विभिन्न केन्द्रीय नेताले नेतृत्व गर्दै मुल जुलुसमा सामेल गराउने छन् । बिहान ११ बजेदेखि उपत्यकाका सबै ठाउँबाट जुलुस सुरु हुने समितिले जनाएको छ । 

समितिका सहसंयोजक योगेश भट्टराईले आजको विरोध सभा आफूहरुको आयोजनामा भएपनि एक पार्टीको मात्रै नभएर सरकार संसद विघटनको विपक्षमा रहेका सबैको भएकाले सरकारको कदमको विरोधमा रहेका सबै शक्तिलाई सभामा सहभागी हुन हिजै फेसबुक लाइभमार्फत अनुरोध गरिसकेका छन् । 

गत माघ ९ गतेपनि प्रचण्ड-माधव समूहले सरकारको विरोधमा काठमाडौंमा प्रदर्शन गरिसकेको छ । त्यसको जवाफमा प्रधानमन्त्री केपी शर्मा ओली समूहले माघ २३ गते प्रदर्शन गरेलगत्तै आज फेरि विरोध प्रदर्शन हुन लागेको हो ।