बागमती प्रदेश लिग फुटबल आजदेखि सुरु हुँदैछ । नुवाकोटमा सुरु हुन लागेको प्रतियोगितामा प्रदेशभित्रका १० टोलीको सहभागिता रहेको छ । 

अखिल नेपाल फुटबल संघ, एन्फाको आयोजना तथा नुवाकोट फुटबल संघको संयोजनमा नुवाकोट आदर्श बहुमुखी क्याम्पसको खेलमैदानमा प्रदेश लिग फुटबल हुन लागेको हो । 

लिगको विजेता टोलीले नगद ५ लाख रुपैयाँ पुरस्कार पाउने छ । यस्तै उपविजेता हुने टोलीले २ लाख ५० हजार रुपैयाँ पुरस्कार पाउने छ ।

लिगमा सहभागि १० टोलीलाई ३ समूहमा विभाजन गरिएको छ । जसअन्तर्गत समूह ए मा नखिपोट युथ क्लब ललितपुर, सौराहा युवा समाज चितवन र न्यू जेनेरेसन युवा क्लब सिन्धुपाल्चोक रहेका छन् ।

समूह बी मा घरेलु टोली नुवाकोट युनाइटेड फुटबल, धादिङ समाज धादिङ, टाइगर टिम दोलखा र नमुना जनउत्थान क्लब सिन्धुली रहेका छन् ।

समूह सी मा न्यू डाँफे युथ क्लब मकवानपुर, आकाश भैरव क्लब काभ्रे र वाइन्ट स्पोटर्स एक्सपोर्टस काठमाडौं रहेका छन् । उद्घाटन खेलमा समूह बी का जनउत्थान सिन्धुली र नुवाकोट युनाइटेड भिड्दैछन् ।