मंगलबार सेयर बजार खुलेको ३० मिनेटमै ५७ अंकले घटेको छ। बजार खुलेको सुरुवाती समयदेखि नै ओरालो लागेको बजारमा ३० मिनेट भित्रै नेगेटिभ सर्किट लागेको हो ।

प्रतिनिधिसभा विघटनविरुद्ध सर्वोच्चमा परेको मुद्दाको फैसला आज आउन सक्ने हल्लाले सेयर बजार ओरालो लागेको विश्लेषकहरूले बताएका छन्।

उनीहरूका अनुसार राजनीतिक अन्योल बढ्ने हल्लाले बजारलाई प्रभावित गरेको हो । 

बैंकिङ प्रणालीमा अहिले पनि तरलता पर्याप्त रहेकाले बजार घट्नुपर्ने अरु सम्भाव्य कारण नरहेको विश्लेषक बताउँछन् ।

तीस मिनेटको अवधिमा १६५ कम्पनीको २० लाख कित्ता सेयर डेढ अर्ब रुपैयाँमा कारोबार भइसकेको छ। 

यो कारोबारमा १५ कम्पनीको मात्रै मूल्य बढेको छ भने बाँकी सबै कम्पनीको सेयर मूल्य ओरालो लागेको छ।

सुरुवाती समयमा सकारात्मक सर्किट लागेको नेपाल इन्फ्रास्ट्रक्चर बैंकको सेयर आज नकारात्मक सर्किट लागेर कारोबार भइरहेको छ। अन्य कम्पनीको सेयर मूल्य अधिकतम ५ प्रतिशत सम्म घटेको छ।