सिडिएससीको नयाँ नियमले लगानीकर्ता जरिवानामा पर्ने जोखिम उच्च बनेको छ । सिडिएससीले आगामी दिनमा अनलाइन मिडियालाई आइपिओको नतिजा प्रकाशन गर्न रोक लगाएको छ । यससँगै सिडिएससीको मेरो सेयरमा चाप परेको छ । मेरो सेयरमा लोड बढेसँगै लगानीकर्ताले सहज रूपमा मेरो सेयर खोल्न पाएका छैनन् । मेरो सेयरमा समस्या आउँदा लगानी कर्ताहरू बिना कारण क्लोज आउटमा पर्न सक्ने देखिएको छ ।
लगानीकर्ताले कारोबारको अन्तिम दिन बिहीबार बेचेको सेयर आज शुक्रबारसम्म डिआइएस अर्थात् सेयर ट्रान्सफर गरिसक्नु पर्ने हुन्छ । सेयर ट्रान्सफर नगरेको खण्डमा भने लगानीकर्ताले २० प्रतिशत जरिवाना तिर्नुपर्ने प्रावधान रहेको छ ।
पछिल्लो समय सेयर बजारका अधिकांश लगानीकर्ताले मेरो सेयरमा रहेको इडिआइएस सेवामार्फत् सेयर ट्रान्सफर गर्दै आएका छन् । तर, मेरो सेयर नै नचल्दा लगानी कर्ताहरू क्लोज आउटको जरिवानामा परिने हो कि भन्दै चिन्तित बनेका छन् ।
आइपिओको नतिजा बिस्तारै अन्य दिनमा पनि हेर्न सकिने भए तापनि सेयर ट्रान्सफरका लागि भने अर्को दिन पर्खन मिल्दैन । ५ वटै लगानीकर्ता संघहरूले पनि गत बुधबार मात्र पछिल्लो समय लगानीकर्ताको कमीकमजोरी नहुँदा नहुँदै पनि मेरो सेयरकै कारण लगानी कर्ताहरू क्लोज आउटमा पारेर दैनिक करोडौं घाटा बेहोर्नु परेको उल्लेख गरेका थिए । सिडिएससीको नयाँ नियमले अहिले सो समस्या झन् बढ्ने निश्चित छ ।
यससँगै लगानीकर्ताले आइपिओको नतिजा हेर्न सास्ती पनि भोगिरहेका छन् । यतिबेला महिला लघुवित्त वित्तीय संस्थाको आइपिओको नतिजा हेर्न बिक्री प्रबन्धकले तयार पारेको वेबसाइट समेत राम्रोसँग खुलेको छैन ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।