सहिद स्मारक ‘बी’ डिभिजन लिगअन्तर्गत बुधबारको दोस्रो खेलमा खुमलटार युवा क्लब विजयी भएको छ । 

सातदोबाटोस्थित एन्फा कम्प्लेक्समा भएको खेलमा उसले ब्वाइज युनियन क्लबमाथि ३–० को सहज जित हात पारेको हो । खुमलटारको जितमा सबिन केसीले २ र आयुष घलानले १ गोल गरे । 

खेलको १९औँ मिनेटमा सबिनले गोल गर्दै खुमलटारलाई अग्रता दिलाए । ४३औँ मिनेटमा सबिनले नै टिमको अग्रतालाई दोब्बर बनाए । 

पहिलो हाफमा २ गोल गरेको खुमलटारले दोस्रो हाफमा १ गोल थप्यो । ७४औँ मिनेटमा आयुषले गोल गरे ।  

जितसँगै खुमलटारले ९ खेलबाट २२ अंक जोड्दा पराजित ब्वाइज युनियनकोे समान खेलबाट १४ अंक छ । 
 
लिगअन्तर्गत आजै भएको पहिलो खेलमा नयाँ बस्ती युवा क्लब र टुसाल युवा क्लबले १–१ को बराबरी खेलेका छन् । 

नयाँ बस्तीका लागि विवेक गुरुङ र टुसालका लागि एलोन राईले समान १–१ गोल गरे । 

यो नतिजासँगै नयाँ बस्तीले ९ खेलबाट १२ अंक जोड्दा टुसालको समान खेलबाट ९ अंक छ ।