दोस्रो चरणमा सुर्खेतका २५ हजारलाई कोरोनाविरुद्धको खोप
फरकधार / २१ फागुन, २०७७
फाइल तस्बिर

कोरोनाविरुद्धको दोस्रो चरणको खोप अभियान अन्तर्गत सुर्खेतका झण्डै २५ हजार नागरिकले खोप लगाउने भएका छन् । फागुन २३ गतेदेखि सुरु हुने दोस्रो चरणको खोप अभियान अन्तर्गत जिल्लाभरका २४ हजार ९ सय ७६ जना नागरिकलाई खोप लगाउने तयारी गरिएको छ । 



दोस्रो चरणमा ६५ वर्षभन्दा माथि उमेरका जेष्ठ नागरिक र पहिलो चरणमा छुटेकाले खोप लगाउन पाउने छन् । दोस्रो चरणको खोप अभियान सफल बनाउन जिल्लाभर ६० वटा खोप केन्द्र तोकिएको जिल्ला जनस्वास्थ्य कार्यालय सुर्खेतले जानकारी दिएको छ । 

त्यसका लागि २ सय ५६ जना स्वास्थ्यकर्मी र ६ सयभन्दा बढी स्वयंसेवक खटिने छन् । त्यस्तै अभियानमा ४ वटा चिकित्सकको टोलीसमेत परिचालन गरिने जिल्ला जनस्वास्थ्य कार्यालय सुर्खेतका प्रमुख चेतननिधि वाग्लेले जनाए ।

खोप हरेक स्थानीय तहका स्वास्थ्य केन्द्रबाट उपलब्ध गराइने छ । कार्यालयका अनुसार २३ गतेदेखि २५ गतेसम्म वीरेन्द्रनगर नगरपालिका, लेकवेशी नगरपालिका, भेरीगंगा नगरपालिका, बराहताल गाउँपालिका र चिंगाड गाउँपालिकामा खोप लगाइने छ । 



त्यस्तै २६ गतेदेखि २८ गतेसम्म चौकुने गाउँपालिका, सिम्ता गाउँपालिका, गुर्भाकोट र पञ्चपुरी नगरपालिकामा खोप अभियान सञ्चालन हुने वाग्लेले जनाए । नेपालमा अहिले ‘कोभिशिल्ड’ खोप प्रयोगमा ल्याइएको छ । खोप लगाएपछि ९० प्रतिशत जोखिम कम गर्ने अपेक्षा गरिएको छ ।

जोखिम क्रमअनुसार १८ वर्षदेखि माथिका सबैलाई खोप लगाउने सरकारको लक्ष्य छ । जसअन्तर्गत पहिलो चरणको खोप अभियान सम्पन्न भइसकेको छ । पहिलो चरणमा ७३ प्रतिशत अर्थात ७ हजार ४७५ जनाले खोप लगाएका थिए । 

पहिलो चरणमध्ये पनि पहिलो पटक २ हजार ३४० जना र दोस्रो पटक ५ हजार १३५ जनाले खोप लगाएका थिए । पहिलो चरणमा खोप लगाएकालाई आगामी वैशाख ७ गतेदेखि १५ गतेसम्म दोस्रो डोज दिने सरकारको तयारी छ । 

  • प्रकाशित मिति : फागुन २१, २०७७ शुक्रबार ८:१९:४३,  

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया