नेपाल कम्युनिस्ट पार्टीका महासचिव नेत्रविक्रम चन्द विप्लव आज दिउँसो दुई बजे काठमाडौंमा सार्वजनिक हुँदैछन् । त्यसका लागि उनी चितवनबाट काठमाडौंका लागि प्रस्थान गरिसकेका छन् ।

यसअघि कसैलाई थाहा नदिइ काठमाडौं पुग्ने योजनामा विप्लव रहेका थिए । 

तर, प्रहरीले थाहा पाएपछि उनलाई स्कर्टिङमा काठमाडौं लगिँदै छ । 

उनी बिहीबार राति नै पूर्वी नवलपरासीको अमरापुरीमा बास बसेका थिए । यो ठाउँमा उनी भूमिगत हुँदा पनि बास बस्ने गरेका थिए । 

तीन वर्षदेखि भूमिगत राजनीति गरिरहेका विप्लव र उनको समूहलाई सरकारले प्रतिबन्ध लगाएको थियो । आज दिउँसो राष्ट्रिय सभा गृहमा विप्लव र प्रधानमन्त्री केपी शर्मा ओलीले एउटै मन्च सेयर गर्दैछन् । त्यही कार्यक्रममा विप्लव र सरकारबीच सहमति पत्रमा हस्ताक्षर पनि हुने भएको छ । 

विप्लव मूलधारको राजनीतिमा आउनुलाई नेपाली कम्युनिस्ट आन्दोलनमा विशेष प्राथमिकताका साथ हेरिएको छ ।