संघीय संसद सचिवालयका प्रवक्ता रोजनाथ पाण्डेले संसदले नेकपालाई सत्तापक्षको रुपमा चिनेको र चिन्ने बताएका छन् । सचिवालयले आयोजना गरेको पत्रकार सम्मेलनमा पाण्डेले यस्तो बताएका हुन् । 

संसद बैठकको तयारी पूरा भएको विषयमा जानकारी दिनका लागि आयोजित पत्रकार सम्मेलनमा प्रवक्ता पाण्डेले नेकपा अहिलेको सत्तापक्ष भएकाले उनीहरुका लागि एउटै लाइनमा बस्ने व्यवस्था मिलाएको बताए । 

प्रवक्ता पाण्डेले कानुनअनुसार सत्तारुढ दल नेकपा एउटै भएको भन्ने बुझ्ने भएकाले संसदले पार्टी फुटेको अवस्थाबाहेक दलमा देखिएको विवादलाई आधार मानेर निर्णय नहुने बताए । 

नेकपाको प्रचण्ड-माधव समूहले आफूहरु आधिकारिक भएको भन्दै प्रवक्ता पाण्डेले पत्र पठाए पनि अहिलेसम्मको व्यवस्था पार्टीको पुरानै अवस्थाका आधारमा गरिएको र ती पत्रहरुमाथि कुनैपनि कानुनी आधारमा काम कारबाही नभएको बताए । 

कार्यव्यवस्था समितिमा विगतमा रहेका १७ जना नै रहने भएकाले समितिमा विवाद नरहेको बताए । सभामुख अग्निप्रसाद सापकोटाले थप सदस्यहरुलाई आमन्त्रण गर्नसक्ने व्यवस्था भएकाले यसमा सभामुखको अधिकारको कुरा भएको उनले बताए ।