नइ प्रकाशनले प्रा.डा. वासुदेव त्रिपाठीलाई ५ लाख रुपैयाँ पुरस्कारसहित ‘महासमालोचक’को उपाधि प्रदान गर्ने भएको छ । 

प्रकाशन गृहले आफ्नो रजत महोत्सवको अवसरमा त्रिपाठीलाई पाँच लाख रुपैयाँ नगदको ‘नइ रजत महोत्सव पुरस्कार’ प्रदान गर्न लागेको हो ।

समालोचनाको परम्परालाई आधुनिक युगमा विविधतापूर्ण, बहुआयामिक र समन्वयवादी दृष्टिले गतिशील, समृद्ध र उन्नत तुल्याउनमा विशेष भूमिका खेलेबापत त्रिपाठीलाई उक्त उपाधि र पुरस्कार प्रदान गर्ने निर्णय भएको नइ प्रकाशनले जनाएको छ । 

उपाधि समर्पण समारोहमा त्रिपाठीलाई देशदेशान्तरबाट सार्वजनिक अभिनन्दन गरिने पनि नइ प्रकाशनका सदस्य सचिव नरेन्द्रराज प्रसाईद्वारा प्रेषित विज्ञप्तिमा जनाइएको छ ।