नेकपा एमालेका सांसद महेश बस्नेतले नेकपा माओवादी केन्द्रलाई न पोथी न भालेको संज्ञा दिएका छन्। बिहीबार बसेको प्रतिनिधिसभाको बैठकको विशेष समयमा बोल्दै सांसद बस्नेतले नेकपा माओवादी केन्द्रलाई न पोथी न भालेको संज्ञा दिएका हुन्। 

माओवादीले प्रधानमन्त्रीले कि विश्वासको मत लिनुपर्ने कि त राजीनामा दिनुपर्ने कुरा संसदमा उठाइरहेका बेला सांसद बस्नेतले यस्तो जवाफ दिएका हुन्। 'हिजो एमाले न पोथी न भाले भन्ने माओवादी केन्द्र आफैँ अहिले न पोथी न भाले बनेको छ', उनले भने, 'अहिले माओवादी सरकारलाई दिएको समर्थन न फिर्ता लिन सक्छ न अविश्वासको प्रस्ताव नै हाल्न सक्छ, त्यसैले उसको हैसियत अहिले न पोथी न भाले भएको छ।'

उनले संसदमा अविश्वास हालेर हटाए एमाले प्रतिपक्षमा बस्न तयार रहेको बताए। 'सरकारलाई संसदमा अविश्वास हालेर हटाए हुन्छ', उनले अगाडि भने, 'हामी प्रतिपक्षमा बस्न तयार छौँ।'