नेकपा एमालेका युवानेता योगेश भट्टराईले सबैले आफ्नो गल्ती सच्याएर आगामी निर्वाचनमा बहुमत ल्याउने गरी अघि बढ्न पार्टीका नेताहरुलाई आग्रह गरेका छन् । 

सोमबार ‘आलोचना र आत्मालोचना बारे’ सामाजिक सञ्जालमा स्टाटस लेख्दै उनले सर्वप्रथम ०७७ फागुन २३ गतेको सर्वोच्च अदालतको फैसलालाई सबैले स्वीकार गर्नुपर्ने बताएका छन् । 

त्यसपछि २०७५ जेष्ठ २ गते कायम रहेको नेकपा एमाले केन्द्रीय कमिटीको बैठक आयोजना गरी सो बैठकमा कसैले कसैमाथि षड्यन्त्र र छलछाम नगरी खुलस्त छलफल गर्न उनले आह्वान गरेका छन् । 
  
आफूबाट भएका गल्तीलाई सबैले दिलबाट स्वीकार गरेर पार्टीलाई विधिसम्मत रुपमा सञ्चालन गर्न सबै तयार हुनुपर्ने उनको भनाइ छ । 
  
त्यसपछि महाधिवेशन र सबै तहका अधिवेशन आयोजना गरेर स्वस्थ र पारदर्शी ढंगले लोकतान्त्रिक अभ्यासबाट आएको परिणाम सबैले स्वीकार गर्न उनले सुझाब दिएका छन् ।  

उनले भनेका छन्, ‘आउने निर्वाचनमा नेकपा एमालेको बहुमत ल्याउन सबैले कसम खाऊँ । जमिनमा टेकौँ र जनतातर्फ फर्कौं । यसैमा छ सबैको भलो ।’