नेकपा एमाले सुदूरपश्चिमका इन्चार्ज डा. भीम रावलले कर्णाली प्रदेशमा सांसदले गरेको पार्टीको ह्विप उल्लंघन नभएर पार्टीको विधान नमान्नेका लागि पाठ सिकाएको बताएका छन् । कर्णाली प्रदेशको जस्तो अवस्था सुदूरपश्चिमसहित देशैभर दोहोरिन सक्ने चेतावनी उनले दिएका छन् ।
नेपाल उत्पीडित जातीय मुक्ति समाज सुदूरपश्चिम प्रदेशद्वारा शनिबार धनगढीमा आयोजित कार्यक्रमलाई सम्बोधन गर्दै उनले यस्तो चेतावनी दिएका हुन् । उनले कर्णालीको पछिल्लो राजनीतिक घटना प्रधानमन्त्री ओलीको कदमविरुद्ध भएको बताए ।
आवश्यक परे अरु प्रदेशमा पनि कर्णाली प्रदेशकै अवस्था सिर्जना हुने घोषणासमेत उनले गरे । राष्ट्रिय एकता र स्वाधीनताका लागि पार्टीको ह्विपको कुनै अर्थ नरहेको उनले बताए ।
‘कर्णाली प्रदेशमा प्रधानमन्त्री ओलीले केही समय पहिले नै प्रमुख सचेतकलाई हटाउन लगाएर विवादको बिउ रोपेका थिए,’ नेता रावलले भने, ‘अहिले सो बिउ उम्रियो र त्यसैले अहिले यस्तो फल दिएको हो ।’ उनले कर्णालीका नेता आफ्नो स्वार्थभन्दा पनि प्रधानमन्त्री ओलीको प्रतिगमनविरुद्ध एक भएको बताए ।
डा. रावलले ओली समूहले सुदूरपश्चिमबाट आफूसहित माधव समूहलाई हराउन खोज्नु सपना मात्रै भएको बताए । भर्खरै सकिएको सुदूरपश्चिम प्रदेश संसदीय दलको बैठकमा पनि २५ जनामध्ये १८ जना माधव समूहमै रहेको उनको दाबी छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।