कर्णाली प्रदेशमा शनिबार नियुक्त भएका मन्त्रीहरूलाई आज (आइतबार) साँझ ६ बजे सपथ ग्रहण गर्ने भएका छन् । प्रदेश प्रमुखको कार्यालय सुर्खेतले ६ बजे सपथ ग्रहणको कार्यक्रम रहेको जानकारी दिएको छ । यसअघि शनिबार साँझ मुख्यमन्त्री महेन्द्रबहादुर शाहीले मन्त्रिमण्डल विस्तार गरेका थिए । नयाँ मन्त्री भूमि व्यवस्था, कृषि तथा सहकारी मन्त्रीमा नन्दसिंह बुढा, भौतिक पूर्वाधार विकास मन्त्रीमा अमरबहादुर थापा र उद्योग, पर्यटन, वन तथा वातावरण मन्त्रीमा कुर्मराज शाही छन् ।

मन्त्री बनेका सबै एमाले माधवकुमार नेपाल समूहका हुन् । तीन जनाले शुक्रबार मुख्यमन्त्री महेन्द्रबहादुर शाहीलाई विश्वासको मत दिएका थिए । पार्टीको ह्विप विपरीत मुख्यमन्त्रीलाई मत दिएपछि नेकपा एमाले प्रदेश कमिटीले तीन जना सांसदलाई शनिबार पार्टीबाट निष्कासित गरिसकेको छ । 

यसैबीच आइतबार मुख्यमन्त्री महेन्द्रबहादुर शाहीले प्रदेश प्रमुख गोविन्दप्रसाद कलौनीसँग भेटवार्ता गरेका छन् । भेटमा नयाँ मन्त्रिमण्डल बिस्तारको बारेमा मुख्यमन्त्रीले जानकारी गराएका थिए ।