कर्णाली प्रदेशमा शनिबार नियुक्त भएका तीनजना मन्त्रीले पद तथा गोपनीयताको शपथ लिएका छन् । आइतबार साँझ ६ बजे प्रदेश प्रमुख गोविन्दप्रसाद कलौनीले उनीहरुलाई शपथ ग्रहण गराएका हुन् । 

मन्त्री बनेका तीनै जना एमालेको माधवकुमार नेपाल समूहका हुन् । तीनैजनाले शुक्रबार मुख्यमन्त्री महेन्द्रबहादुर शाहीलाई विश्वासको मत दिएका थिए । पार्टीको ह्विपविपरीत मुख्यमन्त्रीलाई मत दिएपछि नेकपा एमाले प्रदेश कमिटीले तीनजनालाई पार्टीबाट निष्कासित गरिसकेको छ । 

पूर्वमन्त्री प्रकाश ज्वालालाई कारबाहीका लागि केन्द्रमा सिफारिस गरेको छ । चारैजना प्रदेशसभा सदस्य भएकाले चारैजनालाई कारबाहीका लागि सिफारिस गरिएको छ ।

आज शपथ लिने नयाँ मन्त्रीहरुमा भूमि, व्यवस्था, कृषि तथा सहकारीमन्त्री नन्दसिंह बुढा, भौतिक पूर्वाधार विकासमन्त्री अमरबहादुर थापा र उद्योग, पर्यटन, वन तथा वातावरणमन्त्री कुर्मराज शाही छन् ।