नेकपा माओवादी केन्द्रको स्थायी कमिटी बैठक सकिएको छ । मंगलबार पार्टी कार्यालय पेरिसडाँडामा बसेको बैठक केहीबेर अघिमात्र सकिएको हो । 

आजको बैठकमा सरकारलाई दिएको समर्थन फिर्ताबारे केही निर्णय लिनेबारे छलफल हुने बताइएको थियो । तर, बैठकले समर्थन फिर्ताबारेको कुनै ठोस निर्णय भने गरेको छैन् । बैठकपछि सञ्चारकर्मीसँग कुराकानी गर्दै माओवादी केन्द्रका उपाध्यक्ष नारायणकाजी श्रेष्ठले त्यसबारे छलफल भएको र निर्णय नभइसकेको बताए ।
सरकारलाई दिँदै आएको समर्थन फिर्ताबारे यसअघि पनि छलफल हुँदै आएको थियो । सरकारको विरोध गरिरहने तर समर्थन फिर्ता भने नलिने भन्दै माओवादी केन्द्रको आलोचना हुँदै आएको छ । 

बैठक भोलि पनि बस्ने श्रेष्ठले जानकारी दिए । भोलि बस्ने बैठकले समर्थन फिर्ताबारेको निर्णय लिने पनि उनले बताए । आजको बैठकमा समर्थन फिर्ताबारे छलफल भएपनि निर्णय भने नभएको प्रवक्ता नारायणकाजी श्रेष्ठले जानकारी दिए ।