कर्णाली प्रदेश सरकारले विकट क्षेत्रका कोरोना संक्रमितलाई हेलिकोप्टरमार्फत उद्धार गर्ने निर्णय गरेको छ । सडकको पहुँच नपुगेका क्षेत्र तथा अन्य क्षेत्रका गम्भीर बिरामीको हेलिकोप्टरबाट उद्धार गरिने बताइएको छ । 

कर्णाली प्रदेश विपद् व्यवस्थापन केन्द्रको बिहीबारको बैठकले कम्तीमा १० वटा एम्बुलेन्स तत्काल भाडामा लिई सञ्चालन गर्ने र विकट क्षेत्रका लागि हेलिकोप्टरको समेत व्यवस्था गर्ने निर्णय गरेको हो । 
यस्तै, बैठकले कोभिड आइसोलेसनका लागि आवश्यकताअनुसार निजी होटेललाई सुरक्षा मापदण्डसहित उपयोग गर्नेसमेत निर्णय गरेको छ । 

कोभिड अस्पतालमा २४सै घण्टा विद्युत् आपूर्ति गर्न विद्युत् प्राधिकरणलाई अनुरोध गर्ने, औपचारिक कार्यक्रममा बढीमा २५ जना र अनौपचारिक कार्यक्रममा बढीमा ५ जनाभन्दा बढी भेला हुन नदिने, सुरक्षा सतर्कता अपनाउन जनसमुदायमा व्यापक प्रचार–प्रचार गर्ने निर्णय बैठकले गरेको छ ।