कोरोना भाइरसको दोस्रो लहरका कारण सुर्खेतमा निषेधाज्ञा जारी भएको र सोही समयमा संसद सञ्चालन गरेको भन्दै एमालेले कर्णाली प्रदेशसभा बैठक अवरुद्ध गरेको छ । निषेधाज्ञा गरेर जनतालाई घरभित्र बसाली सरकारले गैरजिम्मेवारपूर्ण काम गरेको भन्दै एमालेका सांसदहरू उभिएर प्रदेशसभा अवरुद्ध पारेका हुन् ।

सभामुख राजबहादुर शाही बैठकको कारबाही सुरु गर्नै लाग्दा एमाले सांसद गुलावजंग शाहीले कोरोनाको महामारी फैलिएको समयमा बैठक बस्नु जायज नभएको भन्दै विरोध जनाएका थिए । त्यस लगत्तै एमालेका सबै सांसदहरू उभिएर बैठक अवरुद्ध पारे ।

सभामुख शाहीले दलीय सहमति गरेर अघि बढ्न आग्रह गरेका थिए । एमालेका सांसदहरूले विरोध गरे पनि करिब १५ मिनेटसम्म बैठक चलेको थियो । अर्को सूचना नआउन्जेसम्म बैठक स्थगित भएको छ ।