दाङको तुलसीपुर उपमहानगरपालिका-६ स्थित स्याउली बजारमा पार्किङ गरेको भारतीय नम्बरको गाडीभित्र तीनजना बालकको शव भेटिएको छ। पार्किङ गरिराखेको आरजे ०१ ०१६६०८८५ नम्बरको कारभित्र तीनजना बालकहरूको शव भेटिएको हो।

इलाका प्रहरी कार्यालय तुलसीपुरका प्रमुख डिएसपी शिवबहादुर सिंहका अनुसार करिब तीन महिनादेखि पार्किङमा रहेको उक्त कारभित्र शव भेटिएका हुन्। 

सिंहका अनुसार गत माघदेखि पार्किङ गरेको कारभित्र भेटिएको शवबारे अनुसन्धान थालिएको छ। उनले यो घटनालाई गम्भीर भन्दै प्रहरीले त्यही अनुसार अनुसन्धान बढाएको जानकारी दिएका छन्। 

मृतकबारे केही खुलिनसकेको उनले बताएका छन्। कारभित्रका शव निकालेर परीक्षणसहितका कानुनी प्रक्रिया पूरा गर्ने काम भइरहेको सिंहले बताएका छन्। नेपालमा अलपत्र अवस्थामा रहेको उक्त कार कसको हो भन्‍ने पनि नखुलेको उनले बताए। प्रहरीले त्यो गाडी पहिलो लकडाउनका बेला पनि नेपाल आएको खुलेको जनाएको छ।

उक्त कारभित्र शव भएको कुरा स्थानीय यातायात व्यवसायीले प्रहरीलाई बताएका थिए। एउटा यात्रुवाहक बस पार्किङका लागि जाने क्रममा कारको इन्डिकेटर बलेपछि चिहाएर हेर्दा शव भेटिएका हुन्। 

तर ती शव सडिसकेको अवस्थामा भेटिएका हुन्। प्रहरीका अनुसार यसअघि तुलसीपुर उपमहानगरपालिका-६ बरूवागाउँका तीन बालक वैशाख १६ गते साँझ हराएका छन्। ती बालकहरू हराएको निवेदन अभिभावकहरूले प्रहरीलाई दिएका थिए। अझै पनि उनीहरु फेला परेका छैनन्।