आइसोलेसनमा रहेका कोरोना संक्रमितका लागि बुटवल उपमहानगरपालिकाले नि:शुल्क अक्सिजन उपलब्ध गराउन थालेको छ ।

उपमहानगरले बनाएको आइसोलेसन, होटल आइसोलेसन तथा आफ्नै घरमा आइसोलेट भएका संक्रमितलाई लक्षित गरी नि:शुल्क अक्सिजन सेवा सुरु गरिएको बुटवल उपमहानगरपालिका मेयर शिवराज सुवेदीले जानकारी दिए ।

स्वासप्रश्वासमा समस्या भएकाहरूबीच तत्काल स्वास्थ्यकर्मीसहितको टोलीले अक्सिजन लिएर पुग्ने बताइएको छ । अक्सिजन सिलिन्डर, सिलिन्डर बोक्ने गाडी, बिरामी बोक्ने एम्बुलेन्स र स्वास्थ्यकर्मीलाई तयारी अवस्थामा राखिएको सुवेदीले बताए । आइसोलेसनबाट सूचना आउनासाथ जनशक्ति परिचालन हुने गरी व्यवस्था मिलाइएको दाबी गरिएको छ ।

होम आइसोलेसनमा बसेका संक्रमितलाई तत्कालै अक्सिजनको व्यवस्था गर्न लागिएको नगर प्रमुख सुवेदीको भनाइ छ । उपप्रमुख गुमादेवी आचार्यको संयोजकत्वमा उपसमिति गठन गरेर अक्सिजन बैंक स्थापनाको प्रक्रिया अघि बढाइएको छ ।