सत्तारुढ नेकपा एमालेका वरिष्ठ नेता माधव कुमार नेपालले अध्यादेशमार्फत संवैधानिक आयोगमा पदपूर्ति गर्न खोज्ने सरकारको कदम अलोकतान्त्रिक भएको बताएका छन् । नेता नेपालले सामाजिक सञ्जालमार्फत यस्तो बताएका हुन् । 

नेता नेपालले कोरोना महामारी नियन्त्रण र जनतालाई आवश्यक स्वास्थ्य सामग्री उपलब्ध गराउनका सरकार केन्द्रित हुनुपर्ने बताए । उनले अहिले महामारी नियन्त्रण पहिलो कुरा भएको बताए । 

महामारीको नियन्त्रणमा सरकार केन्द्रित हुनुपर्ने समयमा ध्यान अन्त लगाउन नहुने नेता नेपालको भनाइ छ । उनले महामारी नियन्त्रण छाडेर बलमिच्याई गरी अध्यादेशमार्फत संवैधानिक आयोगमा पदपूर्ति गर्न खोज्नु सरकारको गैरजिम्मेवारीपन एवं अलोकतान्त्रिक कार्य भएको बताए । 

अहिले मुलुकमा उत्पन्न विषम परिस्थितिमा सरकार जनताप्रतिको आफ्नो मुख्य दायित्वबाट च्युत हुन नमिल्ने नेता नेपालको भनाइ छ । उनले यस्ता कार्य गलत भएको बताए । 

नेता नेपालले विषम परिस्थितिलाई ध्यान दिँदै गलत बाटोबाट गरिने यस्ता नियुक्ति प्रयासहरू तत्काल बन्द गर्न र जनताको जीवन रक्षामा ध्यान केन्द्रित गर्न सरकारलाई आव्हान पनि गरेका छन् ।