काठमाडौं रेजर्स एफसी नेपाल सुपर लिगको विजेता बनेको छ ।
नेपालमै पहिलोपटक आयोजना भएको फ्रेन्चाइज फुटबल सुपर लिगमा शनिबार त्रिपुरेश्वरको दशरथ रंगशालामा धनगढी एफसीमाथि १-० को कठिन जित हात पार्दै काठमाडौं लिगको विजेता बनेको हो ।
खेलको २१ औँ मिनेटमा मेसौके ओलोमोउले गरेको एक मात्र गोल काठमाडौंलाई उपाधि दिलाउन पर्याप्त बन्यो ।
उनले विशाल राईबाट बल खोस्दै विश्वास श्रेष्ठले मिलाइदिएको पासलाई सदुपयोग गरेका हुन् ।
विजेता बनेसँगै काठमाडौंले ट्रफीसहित ३५ लाख पाउँदा उप विजेता बनेको धनगढीले १५ लाखमा चित्त बुझायो ।
लिग अखिल नेपाल फुटबल संघ (एन्फा) को प्राविधिक सहयोगमा नेपाल स्पोर्ट्स एन्ड इभेन्ट म्यानेजमेन्टले आयोजना गरेको हो ।
वैशाख ११ देखि सुरु भएको लिगमा विराटनगर सिटी, ललितपुर सिटी, काठमाडौं रेजर्स, एफसी चितवन, पोखरा थन्डर्स, बुटवल लुम्बिनी र धनगढी एफसीको सहभागिता थियो ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
