सर्वोच्च अदालतले प्रधानमन्त्री केपी शर्मा ओलीले पुनः शपथ लिनु नपर्ने ठहर गरेको छ। मंगलबार प्रधानन्यायाधीश चोलेन्द्र शमशेर जबराको इजलासले निवेदकको माग बमोजिम अन्तरिम आदेश जारी गर्नु नपर्ने ठहर गरेको हो ।

राष्ट्रपति भण्डारीले ‘यो प्रतिज्ञा गर्छु कि’ भन्ने वाक्य उच्चारण गर्न पटक–पटक दोहोर्याउँदा प्रधानमन्त्री ओलीले ‘त्यो पर्दैन’ भन्ने जवाफ दिएका थिए । उनले ‘मुलुक र जनताप्रति पूर्ण बफादार रही सत्य निष्ठापूर्वक यो प्रतिज्ञा गर्छु कि’ र ‘ईश्वर’ भन्ने शब्द छुटाएका थिए ।

तेस्रो पटक प्रधानमन्त्रीका रुपमा नियुक्ति पाएपछि पद तथा गोपनीयताको शपथ लिँदा ओलीले संविधानको उल्लंघन गरेको भन्दै वरिष्ठ अधिवक्ता डा. चन्द्रकान्त ज्ञवाली, अधिवक्ताहरू लोकेन्द्र ओली, नवराज अधिकारी सन्तोष भण्डारी र राजकुमार सुवालले सर्वोच्च अदालतमा रिट दायर गरेका थिए । 

ओलीले शपथ लिँदा शपथको ब्यहोरामा भएको ‘प्रतिज्ञा गर्छु’ उच्चारण गरेका थिएनन्। राष्ट्रपति विद्यादेवी भण्डारीले पुनः दोहोर्याउँदा उनले ‘त्यो पर्दैन’ भन्दै राष्ट्रपतिलाई निर्देशन दिएका थिए । प्रधानमन्त्रीले पद तथा गोपनीयताको शपथ लिँदा राष्ट्रपतिको मर्यादामा समेत आँच पुर्याएको रिट निवेदकको जिकिर थियो।