नेपालले नयाँ आर्थिक वर्षका लागि युवा तथा खेलकुद मन्त्रालयलाई २ अर्ब ७४ करोड बजेट विनियोजन गरेको छ ।
अर्थमन्त्री विष्णुप्रसाद पौडेलले शनिबार आर्थिक वर्ष ०७८÷७९ को बजेट सार्वजनिक गर्दै युवा तथा खेलकुद मन्त्रालयलाई २ अर्ब ७४ करोड बजेट विनियोजना गरिएको जानकारी दिएका हुन् ।
यो रकम चालु आर्थिक वर्षभन्दा ३८ करोड बढी हो । चालु आर्थिक वर्षका लागि युवा तथा खेलकुद मन्त्रालयलाई २ अर्ब ३६ करोड बजेट विनियोजन गरिएको थियो ।
अर्थमन्त्री पौडेलले खेलकुद पूर्वाधारलाई ध्यानमा राख्दै बजेट विनियोजन गरिएको बताए ।
झापाको दमकमा निर्माणाधीन मदन भण्डारी अन्तर्राष्ट्रिय रंगशालालाई २ वर्ष भित्रमा सञ्चालनमा ल्याइने पौडेलले बताए ।
मोरङको बैजनाथपुर, दाङको लमही, रुपन्देहीको भैरहवा, बाँकेको नेपालगञ्ज, कञ्चनपुरको महेन्द्रनगर र काठमाडौंको मूलपानीमा क्रिकेट मैदान सम्पन्न गर्नका लागि आवश्यक बजेट छुट्ट्याइएको छ ।
आगामी वर्ष पोखरा रंगशाला निमार्ण सम्पन्न हुनेछ । सक्रिय खेल जीवनबाट निवृत्त खेलाडीलाई व्यवसाय सञ्चालन गर्न सहुलियतमा ऋण उपलब्ध गराइनेछ ।
इटहरी, जनकपुरधाम, वीरगन्ज, वीरेन्द्रनगर, नेपालगन्ज र धनगढीमा प्रादेशिक रंगशालाको निमार्ण अगाडि बढाइनेछ ।
आगामी आर्थिक वर्षमा १६८ स्थानीय तहमा खेलग्रामको निमार्णका लागि पनि बजेट छुट्ट्याइएको छ ।
सोलुखुम्बु, सिन्धुपाल्चोक, जुम्ला, मनाङ र मुस्ताङमा हाइ अल्टिच्युट स्पोर्ट्स सेन्टर निमार्ण गर्न आवश्यक पर्ने रकम विनियोजन गरिएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।