पूर्वप्रधानमन्त्री तथा जनता समाजवादी पार्टीका संघीय परिषद अध्यक्ष डा. बाबुराम भट्टराईले सरकारले ल्याएको आगामी आर्थिक वर्षको बजेटमाथि टिप्पणी गर्दै नहुने चुनावको एमाले घोषणापत्र भएको बताएका छन् । 

डा. भट्टराईले सामाजिक सञ्जालमार्फत आगामी वर्षको बजेटलाई एमालेको घोषणापत्र भनेका हुन् । उनले नहुने चुनावका लागि एमालेले घोषणापत्र अर्थमन्त्री विष्णुप्रसाद पौडेलमार्फत सार्वजनिक गरेको बताए । 

बजेटले सिधासादा मतदातालाई ललिपप बाँडेको भट्टराईले बताए । उनले लेखेका छन्, 'अर्थमन्त्रीमार्फत वाचन गरिएको नहुने चुनावको एमाले घोषणापत्रमा कुनै संरचनात्मक परिवर्तनको छनक पाइएन । सिधासादा मतदातालाई ललिपप बाँडेको देखियो ।'

डा. भट्टराईले अर्थमन्त्री पौडेलले हिजो वाचनको बजेटमा राखिएको पपुलिज्ममा पनि खासै सिर्जनात्मकता नदेखिएको टिप्पणी गरे । बजेटमा पुरानै घिसेपिटेका नारा र कार्यक्रम भेटिएको उनको भनाइ छ । 

भट्टराईले बजेटले गोरखालाई नसमेटेको कुरापनि व्यङ्ग्यात्मक रुपमा लेखेका छन् । उनले लेखका छन्, 'एउटै नयाँ कुरा एमालेले गोरखामा कुनै उमेदवार नउठाउने बुझियो !'

अर्थमन्त्री मार्फत वाचन गरिएको नहुने चुनावको एमाले घोषणापत्रमा कुनै संरचनात्मक परिवर्तनको छनक पाइएन।सिधासादा मतदातालाई ललीपप बाॅडेको देखियो। पपुलिज्ममा पनि खासै सिर्जनात्मकता देखिएन।उनै घिसेपिटेका नारा र कार्यक्रम भेटियो।एउटै नयाॅ कुरा एमालेले गोरखामा कुनै उमेदवार नउठाउने बुझियो!

— Baburam Bhattarai (@brb1954) May 29, 2021