कोरोना महामारीका कारण अन्तर्राष्ट्रिय उडान बन्द गरेको नेपालले ३ वटा गन्तव्यका लागि उडान खुलाएको छ । सरकारले विभिन्न ४ वटा एयरलाइन्सलाई उडान अनुमति प्रदान गरेको हो । 

पर्यटन तथा नागरिक उड्डयन प्राधिकरणले मंगलबार सूचना जारी गर्दै ४ वटा एयरलाइन्सका लागि सातामा ३ वटा गन्तव्यमा उडान अनुमति दिएको जनाएको छ । 

जसअनुसार दोहाका लागि नेपाल एयरलाइन्स र कतार एयरलाइन्सले अनुमति पाएका छन् । यी दुवैले हरेक साताको सोमबार दोहा उडान गर्नेछन् । 

दिल्लीको लागि नेपाल एयरलाइन्स र एयर इन्डियाले उडान अनुमति पाएका छन् । राष्ट्रिय ध्वजावाहक हरेक बुधबार दिल्ली उडान भर्नेछ भने एयर इन्डियाले शुक्रबार उडान भर्नेछ । 

यता टर्कीको स्तानबुलका लागि भने टर्किस एयरले अनुमति पाएको छ । उसले हरेका सातको बिहीबार उडान भर्नेछ । 

सरकारले अनुमति दिएसँगै प्राधिकरणले जारी गरेको सूचनाअनुसार अनुमति पाएका सबै उडान जुन १ देखि जुन ३० सम्मका लागि हो । 

सरकारले चीनको लागि पनि उडान अनुमति दिएकोमा कुनै एयरलाइन्सले चीन उडानमा रुचि देखाएनन् । चीनतर्फ कुनै वायुसेवाले उडान भर्न चाहेमा शनिबार वा आइतबार उडान तालिका दिने प्राधिकरणको तयारी छ ।