काठमाडौं उपत्यकाका तीनवटै जिल्लाका प्रमुख जिल्ला अधिकारीहरुको संयुक्त बैठक आज बस्दैछ । उपत्यकामा जारी निषेधाज्ञाका विषयमा थप निर्णय गर्नका लागि बैठक बस्न लागेको हो । 

हिजो मंगलबार बसेको बैठकमा गहन छलफल भएको र आजको बैठकले निषेधाज्ञाका विषयमा निर्णय गर्ने बताइएको छ । हिजोको बैठकमा अहिलेसम्मको निषेधाज्ञाको समिक्षा भएको र आगामी विकल्पको विषयमा छलफल भएको थियो । 

आज बस्ने बैठकले काठमाडौं उपत्यकामा कोरोना संक्रमणको समग्र अवस्थाको विश्लेषण गर्ने र नयाँ निर्णय गर्ने तयारी छ ।

हिजोको बैठकले निषेधाज्ञाले कोरोना नियन्त्रणमा सहयोग पुगेको निष्कर्ष निकालेको काठमाडौंका प्रमुख जिल्ला अधिकारी कालीप्रसाद पराजुलीले जानकारी दिए । 

उपत्यकाका तीनवटै प्रशासनले निषेधाज्ञाको समयावधि थप गर्ने विषयमा साझा धारणा बनाएका छन् । तीनै जिल्लाका सिडियोहरु जेठ मसान्तसम्म निषेधाज्ञा लगाउने कुरामा सकारात्मक रहेको बताइएको छ ।