जिल्ला प्रशासन कार्यालय झापाले बिहीबार एक सूचना जारी गरी जेठ मसान्तसम्म निषेधाज्ञा थप गरेको छ । 

जिल्ला कोभिड–१९ संकट व्यवस्थापन केन्द्रको बैठकले जिल्लामा संक्रमण नियन्त्रणमा आइनसकेको निष्कर्ष निकाल्दै निषेधाज्ञा थप गर्न सुझाएको हो । 

वैशाख २२ गते मध्यरातिबाट सुरु गरिएको निषेधाज्ञा पाँचौपटक थप गरिएको हो । निषेधाज्ञा केही खुकुलो बनाइएको छ । 

यसअघि औषधि पसलबाहेक अन्य पसल बन्द गरिएको थियो भने अब आइतबार र बुधबार बिहान ६ देखि ९ बजेसम्म खाद्यान्न, तरकारी, फलफूल, मासु तथा दूध डेरीका पसल खोल्न दिने निर्णय भएको छ । 

झापामा कोरोनाको दोस्रो लहरबाट १२२ जनाको मृत्यु भएको छ । जिल्लाभर अहिले ४ हजार ३२१ जना सक्रिय संक्रमित छन् ।