प्रदेश २ सरकारले प्रदेश सभाको चालु पाँचौं अधिवेशन अन्त्य गर्दै सोमबारबाट बजेट अधिवेशन आह्वान गरेको छ ।

मन्त्रिपरिषद्को सिफारिसमा प्रदेश प्रमुख राजेश झा अहिराजले प्रदेशसभाको बजेट अधिवेशन आह्वान गरेका हुन् ।

बैठकको प्रारम्भमा दलका नेताहरूले शुभकामना दिने र त्यसपछि आर्थिक मामिला तथा योजनामन्त्री विजय यादवले प्रि-बजेटको डकुमेन्ट टेबुल गर्ने कार्यसूची रहेको प्रदेशसभा सचिवालयका निमित्त सचिव रञ्जित यादवले जानकारी दिए ।

प्रदेश सरकारले आर्थिक वर्षको बजेट असार १ गतेभित्र पेस गरिसक्नुपर्ने संवैधानिक प्रावधान छ । सरकारको आगामी वर्षको नीति तथा कार्यक्रम प्रि-बजेट छलफलपछि संसदमा प्रस्तुत हुने छ ।

प्रदेश सरकारले जेठ २७ गते नीति तथा कार्यक्रम ल्याउने तयारी गरेको छ । प्रदेश सभामा प्रदेश प्रमुख राजेश झा अहिराजले आगामी आर्थिक वर्ष ०७८/७९ को नीति तथा कार्यक्रम प्रस्तुत गर्ने छन् ।

नीति तथा कार्यक्रम पछि प्रि-बजेट छलफल गर्ने परम्परा भए पनि कोरोना महामारीका कारण संसद् अधिवेशन ढिलो आह्वान भएकाले नीति तथा कार्यक्रमलाई पछाडि धकेलिएको संसद सचिवालय स्रोतले जनाएको छ ।

यसैबीच आजको बैठकमा पूर्व राजपाका सांसदहरू उपस्थित नहुने बताइएको छ । पार्टीको आन्तरिक निर्देशनानुसार आजको बैठकमा उपस्थित नहुने प्रदेशसभा सदस्य परमेश्वर साहले बताए ।