भारतले निजी अस्पतालहरुलाई कोरोना खोप लगाउने अनुमति दिएको छ । निजी अस्पताललाई तोकिएको शुल्क लिएर कोरोनाभाइरसविरुद्धको भ्याक्सिन लगाउने अनुमति भारत सरकारले दिएको हो ।

भारत सरकारको अनुमति पाएसँगै अब भारतभरका निजी अस्पतालले सरकारले तोकेको शुल्क लिएर कोभिसिल्ड, कोभ्याक्सिन तथा स्पुतनिक भी भ्याक्सिन लगाउन पाउने भएका हुन् । 

स्वास्थ्य मन्त्रालयले विभिन्न खोप अनुसार त्यसलाई तिर्नुपर्ने शुल्कसमेत निर्धारण गरेको छ । भारतीय सञ्चारमाध्यमका अनुसार निजी अस्पतालले कोभिसिल्ड भ्याक्सिनको ७ सय ८० भारतीय रुपैयाँ लिन पाउनेछन् । 

त्यसैगरी, निजी अस्पतालले कोभ्याक्सिनको १ हजार ४१० र स्पुतनिक भी भ्याक्सिनको  १ हजार १४५ भारतीय रुपैयाँ लिन पाउने गरी स्वास्थ्य मन्त्रालयले शुल्क तोकेको समाचारमा उल्लेख छ । 

निजी अस्पताललाई खोपको अनुमति दिएसँगै भारतमा खोप अभियान तीव्र हुने बताइएको छ । भारत कोरोना भाइरसबाट अमेरिकापछि दोस्रो प्रभावित मुलुक हो ।